十六位候選香港小姐昨日到銅鑼灣出席莎莎活動，有爆料指(1)謝芷倫與Simon So已訂婚及將於年底結婚，她最初死撐並不認識Simon，記者隨後出示二人的親密合照，謝芷倫立即面色一沉說：「識，佢係我唱歌學校嘅同學。（啱啱失憶唔認得？）係好耐嘅事，啱啱先醒起。（係咪同Simon拍拖同訂婚？）冇。（相中又翹手又摸大髀影相？）呢個係生日飯局，大家黐得埋啲影相啫！（驚唔驚大家覺得你係大話精﹖）唔驚。」

謝芷倫被踢爆與Simon親密摸大髀，但死撐只是同學。

至於大熱佳麗(11)「大眼DaDa」吳凱欣坦言比賽臨近有少少壓力，又透露每日敷Mask護膚保持最佳狀態，問到會否隱瞞拍拖﹖她說：「做人最緊要光明正大，如果拍拖一定會大方承認囉！唔會隱瞞。」而(3)黃碧蓮被問到謝芷倫負面新聞多多時說：「我唔識睇中文，所以就算自己有負面新聞都影響唔到我。」