謝霆鋒與高圓圓在新片扮情侶，甚少拍純愛片的霆鋒勁減15磅，更指談情比拍動作戲辛苦。堅信一生一世的他，現時學懂放鬆不強求。

曾經離婚的霆鋒，現時學懂佔有不等於一生一世。

為迎戰高圓圓的床戲，霆鋒勁減15磅晒肌。

謝霆鋒早前與內地女星高圓圓合作英皇電影《一生一世》，甚少拍純愛片的他直言是新嘗試，事前秘密練兵操Fit體能迎戰圓圓：「戲中唔止一場接吻戲，仲要除上衣拍，地獄式節食加運動減咗十五磅。（擔心喺圓圓面前失威？）唔係，角色講我要搬搬抬抬，唔應該好食好住咁多肉，初頭以為拍愛情片輕鬆過動作片，點知仲心力交瘁！」

圓圓眼淚結冰

霆鋒拍動作片非常出色，問到會否想憑愛情電影做出成績，他表示沒有想過得獎，只覺是時候嘗試：「有個因素係有得去紐約，我去咗一至兩個星期，係凍咗啲！」並透露紐約之旅主力拍攝與圓圓在街頭久別重逢的鏡頭：「當時佢要喊，自己都凍到鼻涕兩行直流，點知佢啲眼淚同鼻水一出就變冰咁滯！凍到塊面僵晒赤住痛，我戥佢辛苦，但大街大巷冇得避，我都唔知點幫佢！」

貴為影帝又是製作公司老闆的霆鋒曾離婚，現為兩子之父的他飽歷滄桑，談及如何看待「一生一世」，他說：「我信！不過可能喺十年前、年紀再細啲，個一生一世可能係攬住同佔有，依家嘅一生一世係離遠咁支持同祝福，唔知再十年後會點呢？依家學識放軟啲去做，唔係佔有晒。（婚姻係一生一世？）結得婚都係嘅，但我唔抗拒亦唔強求。（再婚？）唔知，隨緣啦！（大家話你係筍盤喎！）唉！唔信！」