16位港姐佳麗昨日初次會晤「星級選民」,其中賽前冷門(4)鍾美琪憑着三吋不爛的事業線「凸」圍而出,但她強調未有「加料」!

鍾美琪(中)又高又凸,比起謝芷倫(左)與蔡曉瑩,身材先勝一仗。

另一佳麗鄧曉霖同樣「胸」神惡煞!

馬國明奉旨睇女,卻露出一副尷尬樣!

應屆16位港姐佳麗昨日穿上大會安排的服裝出席記者會,首次會晤三位「星級選民」陳百祥、馬國明、田蕊妮及大會司儀崔建邦與王祖藍。其中(4)鍾美琪驚現3吋事業線,谷出高低胸出場成焦點,但受訪時否認「加咗料」:「其實好多佳麗都係呢件服飾。(評判前加咗分?)其實每個佳麗都有特色,例如談吐咁,個個都好好。(加工?)我有貼膠紙安全措施,只有Nude Bra冇加墊。(泳衣環節有着數?)其實泳衣環節個個都會好靚。」

熱門之一「索腿傅穎」(12)蔡曉瑩早前被讀者爆料指曾整容,她解釋只是變瘦:「可能係大學時期比較Baby Fat,依家瘦咗嘅效果。(話你爭有婦之夫令人妻自殺?)梗係冇可能!我同男友由中七識到依家。(話你因為爭男友而同朋友大打出手?)不實傳聞,根本冇呢件事。」另一被爆料的「直鼻陳凱琳」(1)謝芷倫,被指一直與IT男友同居,年底更會拉埋天窗,受訪時她亦統統否認,還自稱單身:「一直同家人居住,亦唔會婚前同居。」

馬國明呻無暇拍拖

至於大會統籌經理余詠珊透露,韓星宋智孝有八成機會擔任準決賽嘉賓:「其實搵過韓星池誠同朴海鎮,但最終配合唔到而告吹。」同場的馬國明則表示年屆四十,獲不少朋友介紹異性認識,可惜未有時間去發展;陳百祥則笑言港姐騷是他一年一度唯一有錢收的無綫大騷,希望大家收睇。