貪靚，是女人的天性，相信各位「絲打」每次出門前難免「左襯襯，右襯襯」花掉不少時間，有時發覺頸鏈不襯衫，衫又可能不襯手袋，煩到人都癲。最近潮流興「發皮氣」，歌手蔚雨芯（Rainky）深深被吸引，更落手落腳DIY頸鏈，製作屬於自己的「畫皮」。

Rainky自製獨一無二的皮玫瑰花頸鏈，戴出街認真「威威」！

Rainky建議大家自製首飾或頸鏈，送禮自用皆宜。

Diy4部曲
先用剪刀剪出花瓣，形狀沒有固定，總之細細塊，然後剪裁出不同大大小小的花瓣。

用手指屈曲花瓣，並輕輕捽一捽花邊，令其呈現「朵」形。

圍住「花蕊」，用熱溶膠將花瓣逐一黐實，圍到四至五層就成型喇！

最後，在花花的底部埋口，大家可以按照自己的配搭，配上頸鏈、手繩或者扣針，製成不同飾物。

大功告成

時下潮興手製皮具，皮具工作室因而愈開愈多，不少潮人也會DIY整手袋、銀包或卡片套等，一來可以過手癮消磨時間，二來可以製作一個獨一無二屬於自己的皮具，拿出街也可以「威威」！不過要整一個卡片套，閒閒地要消耗整天時間，如果想快手的話，Rainky建議大家可以整首飾或頸鏈，送禮自用皆宜！

曾遭欺騙買假皮

談到對皮具的認識，Rainky表示喜歡買包包，不過可能因為曾經被欺騙，所以對皮的要求甚高，她說：「皮具一定要搵信得過嘅舖頭買，千祈唔好亂買，我試過買咗個袋，啲皮原來係假嘅，用兩用就爛咗，啲人話真皮有皮味，點知個袋連陣味都做得好真，真係好無奈。」Rainky又建議要保養皮具，一定要將它放入密實袋，連同臭丸一同收藏，皮具的「耐用度」便會大大增長！

問到Rainky最希望另一半手製甚麼皮具給她？她笑說：「整七彩玫瑰啦！呢種玫瑰好貴o架，買唔到自己整番個都得。但最好整個篋畀我，一定好感動，因為女仔好多嘢拎，尤其去登台，唔拖個篋真係唔得。」那麼Rainky又想整甚麼回禮？她說：「或者我會整銀包畀佢，因為可以隨時貼身，陪住周圍去。（要唔要整埋個照片套放合照？）嘩！太肉麻喇！只要佢用我製嘅銀包已經夠喇！」

絕對信任經理人

飾物可以話轉就轉，用到厭可以換新，但對Rainky來說，經理人就絕對不能「話轉就轉」，她說：「之前傳出話我要離開舊公司，我都冇諗咁多嘢，因為我相信我嘅經理人（簡文滌），佢去邊我就跟住，嚟緊除咗做音樂，亦會做多啲電影工作。」