郭晉安、田蕊妮及陳智燊等昨日為劇集《忠奸人》在商場大玩遊戲，其中陳智燊想「公主抱」抱起李亞男時，搞到反晒艇，勁冇面！

陳智燊以「公主抱」方式抱李亞男，一副慘樣，最終搞到雙雙跌落地，瘀爆！

李亞男、陳智燊

吳卓羲孭起劉思希玩遊戲，輕易過關。

郭晉安話咁易抱起田蕊妮。

劇集收視好，即場舉行祝酒儀式。

何遠東要孭起重磅的「細細粒」，多得郭晉安及吳卓羲出手相助。

郭晉安（安仔）、田蕊妮（阿田）、吳卓羲（Ron）及陳智燊等昨日在將軍澳新都城中心出席無綫劇《忠奸人》活動兼玩遊戲。期間陳智燊見到Ron輕易孭起劉思希即有樣學樣，打算「公主抱」抱起李亞男，但最後「反艇」收場，非常失威！至於「細細粒」陳嘉佳則由何遠東、安仔及Ron三人合力揹起，場面爆笑！由於《忠》劇前晚錄得31點收視，監製王心慰與演員做祝酒儀式。

劇中與安仔咀戲甚多的阿田自爆因此搞到老公杜汶澤呷醋：「佢問我使唔使咀咁多？又問我知唔知安仔喺劇中好奸，仲錫佢咁多次！佢變咗『師奶澤』！」

安仔想做壞事

而飾演大奸角的安仔則大讚劇集配樂到位，笑言聽到主題曲即奸人上身：「一聽到就想做壞事同諗衰嘢。（屋企播？）隨時隨地聽！我依家講嘢幾真誠，都畀人嫌假。不過無論我喺套劇殺人定陷害人，有啲粉絲都好撐我。」另外，問到與樣子被批評的劉思希拍咀戲的Ron有否被「頂親」？他即自認鼻高：「佢冇頂親我，可能我自己鼻高會頂親佢。」