藝人曹永廉去年投資開設港式茶餐廳，他日前大爆心郁「約齊」好友如蕭正楠等「齊腳」開分店！而他又大爆死黨黃浩然於拍劇時被窒讀錯對白，就會「躁底」向兄弟動手！

曹永廉去年開餐廳進軍飲食界，事事親力親為。

阿廉不時創新菜色吸引食客，反應不俗。

阿廉打算跟「太監五虎」開分店，有好嘢唔獨食！

曹永廉指「太監五虎」在片場玩到癲，爆黃浩然（左）被寸時會「動粗」。

曹永廉（阿廉）日前於觀塘的自家茶餐廳接受訪問，自爆去年「心思思」與哥哥及友人齊齊創業，投資七位數字夾份開設港式茶餐廳。事事親力親為的他又自認計仔多多，開業首年已不時諗出特別菜式「吸客」，阿廉說：「我哋推出地道茶餐廳美食為主，但我會成日諗吓新菜式，例如整士多啤梨骨同芝麻脆炸雞翼去吸引小朋友。（翻本未？）未！但收入穩定。」他又自爆密謀與「太監五虎」（黎耀祥、蕭正楠、陳國邦、黃浩然）齊腳開舖：「我夠膽搞（分店）o架！同佢哋討論過，大家好死黨，邊個有好路數就搞！（齊腳就夾錢開分店？）錢佢哋不嬲有啦！」

玩到癲互窒對方

談到「太監五虎」，阿廉笑爆五人經常在片場互窒，當中「躁底」的黃浩然更會「郁手」打兄弟：「我哋一齊拍劇都有壓力，不過係良性嘅！因為我哋會玩到癲晒，當中有人講錯對白會畀大家窒到爆，黃浩然仲會掟嘢同打人！不過我哋好Friend，有時冇我戲份，都會去現場幫手！」

另外，阿廉又指對劇集《寒山潛龍》的收視感滿意：「套劇行內同行外口碑都好好，題材好笑又輕鬆，收視跌過又升番。（嗰時有冇壓力？）冇，反應好就算！」