唱作歌手Kellyjackie早前為微電影主題曲作歌，新歌講述女主角有日在男朋友的手機中發現「小三」的留言短訊，最終搞到鬧交收場，問到KJ是否曲如人生？她笑言慶幸從未試過，不過自爆中學拍拖時最鍾意「密蜜傾」，通宵與男朋友偷偷談情：「我份人好鍾意煲電話粥，讀書嘅時候，如果要同男朋友傾通宵電話，一定要等屋企人瞓晒先得，萬一斷咗線，佢再打番嚟，一定會嘈醒屋企人，雖然好驚，但諗起，就覺得依家冇咗呢種少女情懷，因為大家都係Send短訊。」

KJ笑言讀書時很喜歡與男友煲電話粥。

雖有甜蜜回憶，但KJ又大呻此情不再，因為一直都未找到心儀的男朋友，即使早前拍拖，雙方卻因為工作關係，亦未有時間「煲粥」，她說：「對方甚至因為攰得滯，熄埋電話瞓覺，依家真係好期待可以有位男朋友聽吓我講嘢！」

已回復單身的KJ除了作曲，最近還跟好友梁佑嘉一齊學耍雙節棍，她笑言開始的幾堂課幾乎「亂咁嚟」，拎住支雙節棍亂揈，搞到扑親自己，她說：「師傅要我練習耍『8』字，點知係咁扑到自己手瓜，另外有一招叫『背風車』，仲要扑到後尾枕，痛到爆！」