型爸吳尊與萌爆女兒Neinei昨日首度以父女檔出席公開活動，他更為女兒在澳門新濠天地《水舞間》舉行一個別開生面的生日會，對慣鏡頭的Neinei毫不怯場，向觀眾揮手兼送飛吻，兩父女更當眾溫馨咀嘴。吳尊表示愛女將來若要當藝人，定必由他任經理人充當「護女使者」，果然是廿四孝爸爸！

首次欣賞《水舞間》的吳尊大開眼界，大讚台上表演者極之出色。

父女情深的吳尊與Neinei當眾咀嘴，博得全場掌聲！

吳尊為愛女準備重30公斤的生日蛋糕，乃仿製《水舞間》匯演中高達11米的大船場景。

Neinei見到分量十足的蛋糕大感興奮，更俯身向前想一吻蛋糕。

亞洲男神吳尊與愛女Neinei在內地親子真人騷節目《爸爸回來了》大受歡迎，兩人昨日首度以父女檔現身澳門新濠天地《水舞間》四周年慶典。適逢Neinei快將四歲生日，好爸爸吳尊特意為愛女預祝生日，除與女兒欣賞這場世界級巨獻《水舞間》外，Neinei更在公主及王子陪伴下，在這個全球最大型水上匯演的舞台上切蛋糕，度過驚喜又難忘的一晚！

《水舞間》落幕後，吳尊由司儀介紹出場，他表示要給大會驚喜，然後返回後台，再抱着愛女Neinei出場，繼承父親明星風範的Neinei向觀眾賣萌，揮手又派飛吻，惟面對在匯演中演王子及公主的演員時卻略帶腼腆，不時嬌嗲地把頭挨在吳尊身上，其後在王子、公主及吳尊陪同下切蛋糕，她更即時拿起蛋糕上的朱古力塊吃。當司儀問到有甚麼生日願望時，Neinei望着吳尊說：「PaPa（爸爸）。」深知女兒心的吳尊隨即問她要爸爸還是波板糖？她說：「波板糖。」場面搞笑！其後父女倆化身接吻魚咀嘴，溫情洋溢！

吳尊透露與Neinei同是10月10日生日，孻仔則跟太太一樣於10月11日生日，由於日子接近，故屆時會在家中舉行盛大派對，問到送甚麼禮物給太太時，他笑說：「冇，佢鍾意嘅嘢我唔一定生日先買。」吳尊指因孻仔只有十個月大，故不便帶他到場：「囡囡知我嚟澳門，佢好興奮話要嚟。」當記者指Neinei有當童星的潛質時，吳尊卻大唱反調：「佢平時好多嘢講，講唔停，頭先好多閃燈，所以佢有啲緊張，如果佢習慣咗都可以做藝人。」問到言下之意是否不反對女兒入行？他即愛女心切地說：「未知，如果佢入行我要做佢經理人保護佢，佢唔可以同人打工，一定要簽我。」

力讚精彩震撼

另外，首次欣賞《水舞間》的吳尊對表演讚不絕口：「我爸爸兩年前睇過話好精彩，叫我一定要嚟睇。今日親身體驗過，真正感受到嗰份震撼，我覺得好榮幸，可以見證《水舞間》邁向四周年，我知道台上面每一位演員都用咗好多年時間去練習，成功背後係努力、嘗試、失敗、反思、再嘗試嘅堅毅磨練。Neinei喺佢人生舞台上可能會遇到意想不到嘅困難，但親情會係佢永恒嘅避風港！」