英皇電影藝人陳家樂早前在台中拍攝英皇電影《破風》時意外炒單車，跌斷鎖骨，日前回港留醫，昨日獲英皇老闆楊受成接出院。復工心切的他欲於下月復工，但被楊受成勸止，並叮囑他身體要緊。

陳家樂精神奕奕與記者揮手打招呼。

陳家樂獲老闆楊受成（左）接出院。

陳家樂心繫電影進度，楊受成卻叮囑他身體要緊。

陳家樂早前在台中拍攝英皇電影《破風》受傷後，在當地接受手術，日前轉回港休養，留院3日3夜後，昨日傍晚時分出院，獲英皇老闆楊受成、CEO利雅博及藝人部總監Angelina接出院。家樂左手綁上繃帶固定手肘，自行步出醫院，他說：「醫生建議3個月後先好開工，但我想拍啲文戲先，遲吓仲有重要比賽戲份，好想同導演講畀我試吓，我等咗呢個機會好耐！（受傷冇留陰影？）我細個都好頑皮成日跌傷，依家只係擔心唔夠靈活，日日做物理治療，但完全康復可能要半年。我依家盡量唔食止痛藥，但出事時我啲皮膚『磨薑』，加上頸到胸拉傷晒，郁吓都痛，瞓覺要維持一個姿勢。做手術作固定用嘅金屬片，要等一年後睇情況再決定拎唔拎番出嚟。」提到緋聞女友衛詩雅會否心痛？他說：「佢第一日嚟咗探我，有安慰我。」

考慮改用替身

至於楊受成獲悉家樂欲於下月復工後說：「家樂話想拍遲啲場比賽戲份，嚇死我！千祈唔好。（拍攝進度受阻？）少少影響一定有，最緊要個人冇事，見到家樂都開心番，佢康復比預期快。我哋聽日約咗導演（林超賢）同監製開會，商量係咪要為演員用替身，點調整餘下戲份。」並揚言會全力支持家樂：「一定，應該！」