歌手孫耀威接受東網《娛樂onShow》主持俞詠文訪問，大談昔日做唱片辛酸，更自爆對合作過的日本女星酒井法子心動，希望能夠重新聯絡！

早年孫耀威密密在內地拍劇搵銀，近年返港扎根生活。

孫耀威接受Angela訪問，自爆會「殘暴」自己的肌膚。

孫耀威指當年酒井法子令所有男士心動，可惜他當時有女友，未有機會進一步發展。

酒井法子近年於日本人氣回落。

孫耀威日前接受東網《娛樂onShow》主持俞詠文（Angela）訪問，出道20年、今年41歲的他保養得宜，樣貌依然年輕，他卻表示從不護膚，更會「殘暴」肌膚：「拎抹手紙抹面落妝，之後都唔會搽Cream同敷面膜。」得天獨厚的他指盡得媽媽優質遺傳：「似媽媽保持心境開朗、健康，內分泌都會好。我媽媽60幾歲，但似40歲，皮膚都好好。」

有女友一樣心動

當年就讀大學最後一個學年期間，孫耀威便憑歌曲《我知道你在等我》紅爆中港台，他透露當時忙到不可開交，工作後更要即刻返學校趕畢業功課：「當時着住打歌服衝返宿舍，掉低粉絲送嘅花同禮物就去咗電腦室，着住打歌服、唔沖涼、唔刷牙三日做畢業功課。」但因太過操勞，他試過拍MV時邊嘔邊拍，最後暈倒送院，醫生要求他休息一個月，但為了趕宣傳，他惟有欺騙醫生，返港再轉機到新加坡工作。

與日本女星酒井法子合唱過歌曲《有緣千里》的孫耀威，憶述「當年情」仍覺甜蜜，他指當時二人就像一對小情侶：「好甜蜜，每次佢嚟香港都會見我，寫信、送禮物畀我。我覺得佢好得意，好心動，但因為嗰時有女朋友，冇多餘心機同時間，如果唔係，我又點會放過佢？」雖然多年未有聯絡，但孫耀威透露有透過中間人找酒井，亦希望可以重新聯絡對方。