陶大宇最近戒煙成功，日前他為飲食節目做嘉賓時，暢談健康飲食，還自爆偶爾也會偷食薯片來平衡一下，並以薯片來比喻自己「又辣又趣（脆）」，相當搞笑！

陶大宇接受黃芳雯訪問，邊食邊傾。

為Keep住健康身體，陶大宇戒煙兼奉行清淡飲食。

剛從內地工作返港的陶大宇，日前現身有線電視節目《為食情報局》，與主持黃芳雯暢談飲食心得及戒煙成功的經驗。大宇明白健康可貴，於年初成功戒煙，搣甩幾十年的煙癮：「我覺得戒煙係我送畀自己最大嘅禮物，其實戒嘅過程都好辛苦，因為食咗幾十年，好彩到最後都戒得甩。」

大宇素來奉行清淡飲食：「我從來都好擔心要減肥，所以好節制，加上最近覺得身體健康好緊要，因為我好想可以照顧到我媽媽。」不過近年轉往內地工作，他大嘆不習慣內地飲食文化：「內地人有句說話叫『背脊向天人所食』，佢哋真係乜都食，但係我好多嘢唔食，炸蠍子、炸草蜢同野味，我唔會食，所以佢哋覺得我好揀飲擇食。仲有內地食物偏油膩，我會用滾水淥一淥先食。」

商演吸金和味

健康飲食之外，大宇自爆偶爾也會偷食薯片，並以薯片來比喻自己又辣又趣：「我覺得自己好似薯片咁又辣又趣（脆），辣係我脾氣大，個人都好惡；趣就係我同人無論做嘢定係玩，都可以帶樂趣畀人。」近年較少拍電視劇的大宇坦言商演既輕鬆又和味，他笑說：「我應該係屬於舞台，早知早啲唱歌，之前拍咗幾十年劇，好辛苦！」