過往十年,馬浚偉曾演出多部膾炙人口的電視劇,前年他決意離開無綫外闖,希望做到一年一劇、兩電影及一唱片的目標。他直認十多年來從未放棄歌唱事業,更希望作多方面發展,再創事業高峰!

自言早已扮厭正派的馬浚偉,不介意扮演壞人或變態佬。

馬浚偉希望歌影視三棲平衡發展。

在戲中扮演戀人的馬浚偉及楊怡不乏對手戲。

馬浚偉希望在音樂的領域上再創高峰!

最近忙於宣傳新專輯的馬浚偉透露,去年作了首歌給母親,並在母親節期間推出,而今年他亦寫了一首歌給父親,在父親節前後推出:「依家有自己公司可以控制到,可以做喜歡嘅音樂。」

望與無綫再合作

他表示過往亦曾唱歌,但大多數都是電視劇的主題曲:「我當日入行都係希望唱歌同出唱片,咁多年嚟一直冇放低過呢件事,依家覺得時間成熟,可以有自己公司去運作。(減少幕前?)過往十年不停拍劇,有得着嘅,但覺得自己有啲攰。當年我向外闖正係為自己鋪路,電視劇一定會繼續拍,但想接觸多啲電影,希望做到電影、唱片同電視平衡。最好係一年拍一部電視劇、兩部電影同一張唱片,再自己執導拍一部戲,我朝緊呢個方向行。」

問到電影上如何突圍,他表示曾有電影公司老闆問他想做甚麼角色:「我答佢總之唔係大家認為我會做嘅角色,大家都會覺得我會演正派,但其實我想做變態嘅角色,成日做正派,我唔悶觀眾都悶。呢個年代嘅觀眾接受能力好強,唔會因為做過壞人、變態佬,現實中就認定我係!我唔想再做啲虛構嘅超級好人!」提到其演出的無綫劇《守業者》收視報捷創下佳績,他感到高興之餘,若有好劇本和好製作,當然會與無綫再合作。