孖妹跳唱組合AOA的大Ann（吳燕珊）及細Ann（吳燕菁）自小糖黐豆，但大Ann踢爆經常被細Ann欺負，笑言妹妹甚有演奸角天分：「佢成日蝦我，有時老師想鬧佢但鬧錯咗我，佢都冇出嚟澄清，食糖又要食埋我嗰份！」細Ann笑言兩姊妹最愛玩角色扮演：「我哋鍾意演古裝，着媽咪嘅長裙扮大俠，通常都係我做奸角，有發揮啲吖嘛！」

AOA賺到錢兩份使，果然姊妹情深！

雖然細Ann如此「奸詐」，但無損兩姊妹感情，生活上無分你我，共用微博、Instagram及Facebook，銀行亦用聯名戶口，細Ann笑說：「我哋賺嘅錢兩份使，多數係我用多啲，證明家姐好錫我！」