藝人梁政珏日前於歐洲機場被搶手袋，聲稱因沒有護照未能登機如期返港，趕不及拍攝新劇大場面而遭易角，昨日被召回公司解畫的她，坦言花了買一架車的價錢買機票，最終甚麼都做不了，還有機會要向無綫賠償損失！

遭易角兼照肺的梁政珏頓變「三失」，但她面對鏡頭依然笑笑口！

梁政珏將甩底一事詳盡告知樂易玲，傾足一粒鐘。

梁政珏上月請假偕男友及家人到歐洲出席妹妹畢業禮，原定於本月1日假期完結返港，期間因新劇《梟雄》要拍攝一場大場面，政珏即自掏腰包改機票提早返港，她聲稱在機場等上機時被搶去放着護照的手袋，最終未能成功登機，其後幾經轉折，花了三天才返抵香港，但亦因甩底，角色已由沈卓盈取替。

樂易玲冇鬧

政珏昨午被召返無綫會見高層交代事件，約一小時後獨自離開，她表示已把事情一一告知高層樂易玲，問到有否被罵？她說：「冇鬧，只話我大頭蝦，都好體諒，其實我都三失，冇咗個Job，冇埋護照，仲要補錢買機票，幾多錢唔想講，總之足夠買架車啦！依家仲搞到有少少發燒添！」

對於被易角，政珏深感可惜，問到無綫如何懲罰？她指要向公司出示報失紙、新登機證及重新購買機票單據，以證明她沒有講大話：「今次事件畀人覺得我掛住拍拖唔做嘢，其實唔係咁o架！（賠錢？）填唔到個Show就要賠錢，希望一切順利啦！」