富二代鍾采羲近年努力擺脫o靚模形象，轉型拍戲令星途走得更遠，而她在愛情路上亦然，由從前性感低胸喜愛夜蒲，到現在終於有人出現，令她像着魔般消失於蒲場，可見愛情魔力之大！

每次提起男友，Iris都會一副甜絲絲的樣子，看來愛情的威力真的很大。

Iris極力擺脫o靚模形象，希望在演藝及生意上都能做出成績。

Iris（左）感激施念慈的提攜及幫助，努力為她洗脫o靚模之名。

Iris（右起）曾與周秀娜及梁政珏合演電影，決心殺入影壇。

曾是o靚模的Iris曾推出性感寫真。

鍾采羲

鍾采羲

愛情來到時，除了他，所有事情都不再重要。這句話着實說穿了鍾采羲（Iris）的心聲，相約她做訪問，看她十月芥菜的樣子，不用問都知感情已有着落。現年26歲的她，坦言今次遇上真愛：「佢比我大三年，係以前喺美國讀書嘅同學，佢所有嘢都好好，雖然屋企環境都唔錯，但佢有能力搵錢，帶好嘅生活畀家人，唔係二世祖。我本身個人好冇安全感，但佢畀到我，好明白我嘅感受……」下刪一千字的讚美，男友看見後必定心甜。

「富二代」靠自己

找到這位Mr. Right，最大好處是令她找到更多人生目標，帶來更多正面影響，例如開始做運動、戒蒲及懂得享受生活，她說：「佢成日叫我唔好咁Hea同浪費時間，不過朋友同同事真係少見面咗，我依家計劃緊開時裝店，希望拍戲之外都搵到新目標，係佢令我更加想做生意！」

本身家境富裕的Iris，坦言受男友及父母鼓勵，決心升呢做老闆娘，更計劃投資百萬：「我打算年底開得成，依家物色緊中、上環樓上舖，專攻歐洲OL款，我已經搵到貨源，對自己嘅眼光好有信心！」有話直說的她坦言父母一直認為其性格不適合做藝人，故打本給她學做小生意，將來打理家族業務。雖然有家人支持，但Iris堅稱並非只是個依賴家人的「富二代」：「我唔富啦！其實我真係好窮，屋企有錢關我咩事？我唔係想靠自己，我都想靠人，不過我父母都笑我咁大個人冇理由靠屋企，我希望至少似番個正常人，對自己嘅人生負起責任。」

努力接戲轉型

忙於拍拖又要開舖的Iris，對演藝事業仍有一團火，她直言入行近四年，公司努力為她轉型，接拍了幾部戲，努力洗走o靚模味，她更感激老闆施念慈努力為公司轉型：「講真我只係個細路仔，難聽啲講連腦囟都未生埋，但我相信老闆好用心去轉型，令成間公司都成長，將成個模式扭轉，佢好努力帶我哋去韓國影展、澳門影展，真係好有心！」如此盛讚老闆，果然識做人。Iris又自爆入行後不停撞板：「呢幾年好啲，至少我知自己撞板，前幾年得罪人或蝕底都真係後知後覺，以前人哋同我講咩我就會信，依家我聽完都會分析，唔會因為同佢關係好就影響判斷，除非有道理，否則我唔會改變諗法，人愈大經歷就唔同！」

寸o靚模Cheap得過分

在剛過去的o靚模寫真戰，一眾o靚模各施各法博版面，騎呢指數更創新高，作為前輩的Iris不禁倒抽一口涼氣：「唔可以怪人哋，依家啲o靚模Cheap，比起我三年前出寫真，當時都會畀好多人鬧，但未去到咁過分，依家佢哋做出嘅行為，連『o靚模』都稱唔上，當年話我係o靚模，我會接受，但依家叫佢哋o靚模，我覺得係抬高咗佢哋！」