倪晨曦勇氣可伽

近期圈中流行一股瑜伽熱潮，學習瑜伽近兩年的模特兒倪晨曦更是其中的狂熱分子。月前考獲瑜伽教練牌的她自爆曾發生意外差點「毀容」，直至遇上亦師亦友的資深瑜伽導師Samrat Dasgupta，多得對方悉心教導及努力練習後才大有進步，二人更展現默契，大玩雙人瑜伽！

Elva學習瑜伽不足兩年，月前更考獲瑜伽教練牌。

Elva認為香港是一個壓力大的城市，做瑜伽可以令人放鬆。

Elva回憶初學瑜伽試做倒立時，因失誤而差點「毀容」。

五式瑜伽當中，Elva最愛Full Dancer，可展示女性動作優雅兼具力量的一面。

Elva與資深瑜伽導師Samrat 亦師亦友，做雙人瑜伽時非常合拍。

Acro-yoga難度甚高，幸好Elva與Samrat默契十足，練起來駕輕就熟。

華姐出身的倪晨曦（Elva）自年前接觸瑜伽後，便愛上這種運動，希望藉此鍛煉身體及修煉心靈。學習瑜伽不足兩年的她，月前更考獲瑜伽教練牌，惟她卻志不在教人：「瑜伽係我好鍾意嘅運動，我呢個階段考牌唔係為咗教人，只係想了解多啲瑜伽嘅背景資料同歷史。考牌亦唔係為咗想證明自己做得有幾好，反而當係一種自我修煉，亦係一個對自己嘅鼓勵，等將來有更多進步空間。」Elva更透露未來打算再修讀不同課程，逐步提升自己，果然對瑜伽充滿熱誠！

初學期間常蝦碌

俗語有云「No Pain, No Gain」，甚有瑜伽天分的Elva雖然只用了一年多時間便考獲導師牌，比起一般人花數年時間快得多，但初學瑜伽時亦曾發生不少蝦碌事：「當做咗少少練習嘅時候，會想自己再進步多啲，亦自然好想試吓做其他嘅動作。有一次我喺屋企試做Headstand（倒立），當我對腳挨落道門嘅時候，先發現原來道門未閂好，結果成個人撻咗落地。」她又表示有次更差點「毀容」：「嗰次又係試做倒立，當我個人挨落幅牆嗰陣，點知突然失去平衡，結果塊面就撞咗落前面啲櫃度，搞到瘀咗一撻。」

Elva由初學瑜伽到修讀導師課程，均是Pure Yoga資深瑜伽導師Samrat Dasgupta的學生。Samrat擁有豐富瑜伽經驗，並獲獎無數，於拍攝期間除了從旁指導Elva如何擺出靚靚甫士外，亦會出言鼓勵她，可見二人亦師亦友。Samrat對Elva這位學生更是有讚冇彈：「我同Elva識咗大約兩年，佢初初跟我學瑜伽嘅時候，雖然身體好柔軟，但就唔係好夠力量。不過佢進步得好快，自從上完導師課程後，佢就改善咗好多，仲好自律成日去練習。」

講求專注力減壓

圈中有不少藝人也是瑜伽愛好者，問到Elva會否擔心「人比人，比死人」，她說：「做瑜伽唔係一啲有得比較嘅運動，因為佢好講求專注力，唔會在意身邊有咩人，或者其他人做得好唔好。」她更笑言就算「Cool魔」張智霖在身旁亦不為所動。有意學瑜伽的各位，更可參考Elva對初學者的意見，她說：「生活喺香港一個咁大壓力嘅城市，做瑜伽可以令人放鬆，而且喺屋企都做得到，大家可以由淺入深試吓，不過最緊要唔好同人比較，專注做好自己就夠。」