擁有自家跳舞學校的狄易達，眼見近來學生愈收愈多，豪擲過百萬擴充跳舞王國，更請來不同的「舞」林高手助陣，除應付日常教學外，達仔更「公器私用」，從高手身上吸收各路「舞」功，務求令舞台表演更加精彩！ 　

狄易達豪花百萬擴充舞蹈學校，更有信心回本。

雖然本身「舞」功高強，但狄易達仍會向其他導師偷師增強實力。

跳出個未來的狄易達，希望可在新界增設分校教跳舞。

歌手狄易達「舞」功高強，除了在舞台上大晒精湛舞技外，近年他成立舞蹈學校開班授徒。學生收到冇停手的達仔早前更將其舞蹈學校擴充，遷至比舊址足足大一倍的九龍灣，打造過千呎跳舞王國，他說：「跳舞學校以前喺旺角，得700呎，跳完都冇乜地方休息，又唔可以容納好多人。依家呢度淨係跳舞嘅地方已經有1,200、1,300呎，除咗跳舞室外，仲有音樂房、Office同廳等設備。」除跳舞外，達仔更夥拍師兄阿健開設技巧體操班，以開拓新客源。

有信心回本

擴張新校意味着要花一大筆金錢，達仔直言已豪擲過百萬：「排舞室入面有塊板差唔多令我Over Budget，因為我哋加咗塊板，將間房分兩邊，塊板可以做到真正嘅隔音效果，所以特別貴！加上愈高嘅樓底裝修費又好貴，地方大咗加大埋冷氣，燈又要夠勁，仲有啲音響，計埋音樂房一定過百萬！」問到一擲千金會否擔心不能回本？達仔說：「雖然壓力大咗，但回本都有計劃，以前地方細，壓力可能冇咁大，但相對收入都冇咁多。依家大咗好多，搵學生可能要搵600人。（預幾多時間回本？）曾經有前輩同我講話半年可以回本，信心我有，但都冇咁大想頭，可能要年幾先可以做到成績，如果呢度做得好，仲想喺新界區開多間！」

「加料」先夠勁

雖然跳舞學校愈做愈大，但達仔揚言舞台演出一直是心中最愛，更希望與學校其他導師一起合作，將更多新舞蹈元素加入舞台表演當中：「以前啲人成日話街舞點會上到舞台，同人比一定爭好遠。但我哋做咗啲嘢係畀人知道街舞真係可以帶上台，亦都會好好睇。坦白講，狄易達跳舞唔算好勁好勁，所以我招募其他導師，教我其他跳舞元素，令我更加厲害！」