大隻仔羅仲謙（謙仔）向來予人陽光正氣的感覺，為打破既定枷鎖，香港新進導演孔令政特地安排他於《第七謊言》中擔任內心黑暗的犯罪角色。拋開形象包袱的謙仔演技獲導演激賞，為電影首次留鬚的他，卻謙稱未想過憑戲獲獎項提名！

羅仲謙破格扮演犯罪角色，卻謙稱「未夠班」諗獎項提名。

導演孔令政（左）大讚羅仲謙演技有突破。

首次為戲留鬚的羅仲謙，形象令人耳目一新。

香港新進導演孔令政（James）新片《第七謊言》找來形象陽光及正氣的羅仲謙，扮演黑暗的犯罪角色，令觀眾耳目一新，電影更獲選為本年度夏日國際電影節放映戲碼，於本月13及16日在香港放映，早已先睹為快的謙仔自評今次演出有突破：「我估唔到自己可以咁唔同，唔係大家熟悉嘅羅仲謙，外形上第一次留鬚，角色心理唔單止好複雜，仲好有層次，James畀空間我去演繹，佢鍾意Take（拍）長啲嘅戲，咁演員就可以將起承轉合做得更好同更有發揮！」

期待再次合作

當問到會否想藉該片獲得獎項提名時，謙仔笑言冇咁大想頭：「我唔敢諗，套戲我有份參與，又喺外國攞到最佳外語片，我已經好興奮！我同導演合作愉快，拍完已經即刻問佢幾時開第二套？」James聞言直指開戲需時：「開戲係好複雜嘅問題，導演基本上似個經紀，要搵投資者同Line Up好多嘢，又要花好多時間，我想將創作做好啲，所以要做長啲準備，好過貿貿然拍咗之後先後悔！」並指在選角時落足心機去發掘演員的另一面：「其實喺《第七謊言》入面，無論係鄭中基、謙仔定吳嘉龍，戲內嘅每一個演員，我都想發掘佢未演過嘅一面畀觀眾睇！因為謙仔一向畀人陽光同正面嘅感覺，所以我今次就要佢演黑色、犯罪同充滿人性黑暗嘅一面，希望帶到新鮮感畀觀眾，我都好滿意佢嘅演出！」