忙跑巡唱的歌神陳奕迅（Eason），難得放假與老婆徐濠縈及女兒陳康堤舉家到倫敦。享受天倫樂之際，香港卻驚爆Eason「收山」報道，經理人陳家瑛已即時發聲明澄清。昨日收拾心情返港的Eason首度開腔回應：「我從來都唔會講退休，只係想抖吓啫！」

一身「藍孩子」打扮的Eason雖然滿面鬚根，但甚為吸睛！

從倫敦度完假的Eason與阿徐及女兒包包回港。

Eason不肯透露有否趁假期努力造人。

趁女兒陳康堤（包包）放暑假，Eason一家三口開開心心到倫敦度假，阿徐連日來亦有在網上分享她踩單車、與Eason及包包瞓草地的溫馨家庭照。當Eason享受家庭樂之際，在香港卻有報道指他接受電台訪問時表示完成手頭上的兩張唱片合約便會暫別樂壇，即時觸動不少「臣迷」神經，鬧出Eason退休之說！

講造人面紅

昨午一時，Eason結束倫敦之旅返港，經過十多小時的長途機後，明顯疲憊不堪的Eason鬚根滿面，不過以全藍色造型推行李出閘的他頗為搶鏡！而阿徐與女兒包包則緊隨其後，二人更戴草帽以「母女裝」出現。至於Eason唯恐坐足十多小時飛機會「口臭」，以手掩口說：「我冇嘢講喎，辛苦你呀！（趕返嚟去內地巡唱？）係呀，要做嘢！（放到唔想返嚟？）唔得、唔得！」並指自己到倫敦「後Join」妻女，故放假不足一星期。

對於在訪問中指完成唱片合約便「劈炮」一事，Eason急忙解釋：「係放慢啲啫，依家都慢緊（扮慢行）！點會唔唱，只係想啲嘢精啲啫。」並否認退休之說：「點會唔做？我繼續做緊o架，我都冇講嗰兩個字！（退休？）點會講退休，從來都唔講，想一路放慢緊。（一年一張專輯都唔夠慢？）唔關唱片事！（係演唱會？）係啦！所以做埋呢兩年演唱會唔做住喇，由2007年到依家都冇停過開，要抖吓。」既然未有退休打算，Eason可會趁這次假期努力造人？他尷尬地說：「呢啲唔講啦，我依家識得怕醜o架。」