Jonah Hill與Channing Tatum主演的《囧探出更》（22 Jump Street）今個暑假提早開學，Channing冒着被Jonah射爆下體的風險瞓身演出，希望再創上集過億票房的佳績！

今集故事繼續圍繞這對最佳拍檔Jenko（Channing Tatum飾）及Schmidt（Jonah Hill飾），做番「老本行」潛入大學校園捉拿毒品拆家。可是，青春洋溢的大學校園生活卻帶來無盡引誘，兩位超齡學生很快便將任務拋諸腦後，各自依照興趣瞓身投入校園生活，慢慢因為彼此的性格及人生目標差異令拍檔關係出現裂痕，未知二人最終能否做回好兄弟完成任務，抑或分道揚鑣、劈炮唔撈當大學生？

親身上陣拍打戲

雖然Channing一向對拍攝續集十分抗拒，但今次卻例外：「我都唔知點解，今次對我嚟講，拍續集係順理成章嘅事，因為佢哋的確要上大學嘛！不過第三集就真係難啲，我諗唔到佢哋仲可以去邊。」而Jonah說：「既然要拍續集，我哋就要鞭策自己做好啲。」

雖然《22》表面只是一套笑片，但當中不乏Channing最愛的危險動作場面，雖然他已為人父，但依然毫不錫身：「所有佢哋准許我親自應付嘅動作場面我都會去做，有時就算佢哋唔畀，我都會照上。」Jonah說：「有一幕Jenko要企喺一架車速高達每小時60英里嘅貨櫃車上，嗰個真係Channing，唔係替身！不過佢身邊嗰個當然唔係我啦！」雖然Channing無懼企車頂，但他亦有「淆底」的時候：「每次我見到Jonah拎住支已上膛嘅手槍，我都好X緊張，因為佢要用支槍對住我嘅睾丸！」

惡搞海報上埋太空

隨着《囧》片相隔兩年便再度添食，由英文名稱「21 Jump Street」升至「22 Jump Street」，多款惡搞海報亦隨即曝光，將數字不停延伸：

有以外國交流生為主題的「24」系列海報，齊齊黐晒鬚扮交流生。

又有「25」系列講述兩位主角出海冒險，海報造型似足「魔盜王」的風格。

另外更有「添食」至「2121」系列，二人索性離開地球，變身做太空人上太空。

必睇爆笑場面：亡命跳

身手了得的Channing一身美式足球員的打扮從高處一躍而下，懶理下體現形，照樣Chok甫。

亂咁片

Channing與Jonah懶理途人目光，坐在巨型頭盔的四驅車於大街大巷橫衝直撞，Jonah更嚇到走晒樣。