鄭伊健及周秀娜前晚出席新片首映時大爆「假戲真做」，計劃與導演鄭丹瑞喬裝睇舖開咖啡店；而同場的楊千嬅則大爆被老公丁子高投訴冇心思為他慶生！

鄭伊健及周秀娜成晚有講有笑，唔通傾緊開Cafe大計？

楊千嬅自爆被老公投訴冇心思。

錢嘉樂及湯盈盈行孖咇出席活動，大晒恩愛！

曾與阿旦合作拍劇的李若彤，一見面即扭阿旦耳仔，十分搞笑！

鄭伊健、周秀娜及楊千嬅等前晚現身電影《分手100次》首映禮，伊健大爆將與娜姐及鄭丹瑞（阿旦）「假戲真做」開咖啡店：「戲入面我哋開咖啡店，不過拍完後店主唔肯賣舖，所以計劃開番間。（睇舖？）會喬裝。（問准蒙嘉慧？）唔使，今次鐵三角陣容。（搵舖？）可遇不可求。（改店名？）未改！」問到有否做生意經驗，伊健即自爆曾開氣槍店，但最後被逮捕收場：「達到夢想同實踐係好唔同，我哋畀警察檢查，被人通緝同逮捕。不過係批氣槍有問題，唔係我哋。（蝕錢？）嗰時蝕得幾多，所以一路冇諗做生意！」而娜姐則笑言有外國人以為他們戲內的咖啡店真的在營業。

千嬅被老公投訴

至於日前為老公丁子高提早慶生的千嬅表示，有意在家下廚慶祝，更大爆被老公投訴冇心思：「佢一直以為我會準備驚喜，但我趕戲太忙，今年畀佢嘅驚喜就係咩都冇！（內疚？）有反省，因為佢話我咁多年淨係幫佢搞過一次生日，但佢年年都有幫我搞。」提到好友陳奕迅日前揚言退休，千嬅則指從未聽過對方提及。

而同場的錢嘉樂及湯盈盈則孖公仔到場，盈盈否認曾因囡囡樣貌被狠批而狂喊，而嘉樂則笑言囡囡似他一定靚。