人生有個真正朋友的確好！台灣組合蘇打綠的成員都老友鬼鬼，主音青峰與結他手劉家凱特別投契，他倆經常互寸笑料百出，今次更玩「變性」扮女人，家凱更以一招「蘭花手」，令青峰輸得心服口服！

擁有美滿家庭的蘇打綠結他手劉家凱不僅家有嬌妻，更有個可愛囝囝Edward，一家人「笑聲笑聲滿載溫馨」！與家凱住同一幢樓的青峰更「近水樓台」，經常玩B及幫家凱湊仔，成為Edward的「第二位爸爸」！

不過兩位男士今次就唔玩湊B，轉玩美容護膚，一敷Mask就「貴婦」上身，無論舉止、神情都十分嫵媚！睇睇兩位貴婦，鋪好毛巾為免塊Mask整污糟件衫，又夾起劉海，比女仔更姿整！家凱以一招「蘭花手」拎手袋，充分表現出骨子裏的「姣」！兩人又交足戲，一個表情招積，一個面露不屑，令青峰都不禁留言「自嘲」比不上家凱：「約我來敷臉，但比不上他美，敷臉也那麼有氣勢。」網友都大讚家凱演技佳，不過勸家凱千萬不要在囝囝面前扮女人，免得他留下「童年陰影」！