藝人為博出位可以去得很盡！英國女歌手Lily Allen日前出發往澳洲開騷，貪玩的她竟在機場要求當地警方扮被拘捕兼合照，最終玩出火，連累該警員接受內部調查！未知其出位行徑是否為谷銷量欠佳的新碟呢？

歌手Lily Allen前日下午從澳洲悉尼飛往黃金海岸，準備出席當晚於拜倫貝灣舉行的《Splendour In The Grass音樂節》，她以素顏及一身便服現身悉尼機場，頭上戴有墨鏡及巨型金耳環作點綴「遮醜」，與平日在台上的「Rock妹」形象截然不同！

7千網友激讚

Lily抵達黃金海岸機場時，獲多名粉絲及警員迎接，她即發揮搞事兼爛玩本色，要求警員將其雙手扣上，並跪地扮被拘捕，目的只為博出位！一名男警員竟有求必應陪佢癲，完全未有理會警員守則。照片上載Instagram三小時後已獲逾7千名粉絲按讚，網友亦議論紛紛，最終更惹來警察當局展開內部調查！澳洲國家警察發言人說：「Allen小姐要求影相，所以警員先將冇扣上嘅手銬箍住佢雙手同佢擺甫士影相，咁做係違反警員基本守則。Allen小姐係冇被逮捕，亦冇被調查，而犯規嘅警員正被內部調查。」Lily事後已刪相，而其發言人並未就事件作出回應。該名警員有可能接受紀律處分，Lily亦隨時會被警方檢控。

未知Lily是否因新碟《Sheezus》銷量未如理想而扮被捕博出位谷銷量，Lily早前將責任推到經理人身上，指他揀錯歌，惟其後又承認可能是歌曲質素欠佳：「我依家會信任其他人，以前只會憑自己感覺，但可能係因為受賀爾蒙影響令我冇以前咁有自信。可能今次啲歌唔係咁好，我只係知道我好想快啲再返錄音室。」