前亞姐羅霖與前夫劉坤銘兩年多前宣布分居，可惜再見不是朋友，不時互數，昨日羅霖出席有份投資的醫療集團開幕禮時，突然飲泣自爆曾遭前夫家暴才導致離婚。而劉坤銘獲悉事件後表示不再回應，然而不忘暗寸對方博宣傳。

羅霖

羅霖突然頭耷耷眼濕濕又擰歪面，飲泣自爆離婚原因是遭家暴！

羅霖滿場飛招呼賓客，與葉家寶抱抱，與身旁的肥媽及伍詠薇同樣風騷。

葉家寶（左）

羅霖、伍詠薇及肥媽昨日以股東身份出席醫療集團開幕禮，身為主人家的羅霖不時主動招呼賓客，又與亞視高層葉家寶情深抱抱，全程表現風騷。不過接受傳媒訪問期間，她卻突然眼泛淚光，更忍不住低頭啜泣，及後哽咽地說：「之前同小朋友去完旅行返嚟，嘗試同前夫做番朋友，主動同佢打招呼，但佢冇咩理睬，我希望除咗工作，都想好盡力去安排同照顧三個小朋友嘅心靈，呢兩年我做咩都問心無愧。」

其後羅霖又指兩年來一直有人在小朋友面前就離婚真相而講些誤導性說話，故她決定講出真相，她聲稱因自己遭受家暴才離婚，不過拒絕透露事發經過：「發生喺兩年幾前，就連小朋友聽到有聲響，有出嚟睇咩事，我同佢哋講冇事，我哋只係嗌交，所以小朋友係唔知情。」

心靈受創留陰影

不過，她否認家暴誘因跟第三者及錢銀轇轕有關，但當時怕嚇壞小朋友，故沒有報警及驗傷，問到有否證據？她說：「我冇驗傷，發生咗件事都唔會自拍。（驚唔驚被人告你誹謗？）唔怕！因為係事實。（有冇因為家暴而留下陰影？）陰影一定有，因為未試過，係唯一一次。（當時傷勢點？）冇乜大礙，但無論傷勢大小，心靈都受到創傷。會驚，我有陰影。（會唔會怕畀人話你博宣傳？）我唔會用唔開心嘅事去宣傳，只會用開心嘅事去宣傳。」

唔想囝囝受影響

至於為何一直沒有公開原因，羅霖解釋：「其實係希望小朋友可以慢慢接受，其實真正原因係家暴。我希望今後唔會再影響我啲小朋友，希望過自己新生活！」

伍詠薇對於羅霖自爆遭家暴，她不願置評：「我冇親耳聽到，而且我唔係當事人，唔方便評論。」其後她透露早前進行了抽脂：「過程唔痛，半麻醉，喺肚臍位度抽，抽咗唔係好耐。」