「魔鬼胸」蔚雨芯（Rainky）早前跟隨經理人轉投新公司，「升呢」做師姐的她感激陳百祥在舊公司時的百般呵護。將以歌影兩棲發展的她更涉足飲食生意，投資六位數做老闆！

「升呢」做師姐的蔚雨芯帶師弟王顯聰見識世面。

蔚雨芯大讚師弟似翻版李璨琛。

出道2年多的的蔚雨芯最近投資六位數進軍飲食界。

早前Rainky與狄易達跟隨經理人簡文滌過檔，但Rainky仍感激陳百祥（阿叻）在舊公司的照顧：「叻哥喺我哋舊公司冇股份，但佢好出心出力，當我哋契仔契女，好照顧我哋！」

冇資源致離巢

她又解釋離巢是因為資源問題：「依家唱片市道差，做音樂好難幫公司賺錢，公司大老闆自然會Cut Budget，咁對我哋做歌手有困難，MV同歌想做靚啲同好啲，要人力物力配合，呢啲都需要錢，但公司冇投放資源。咁啱我同達仔差唔多完約，所以決定離開。」

Rainky帶同師弟王顯聰接受訪問，問到Rainky「升呢」做師姐的感覺，她說：「冇呀，仲跟緊佢（王顯聰）學跳舞，我出咗道兩年幾，公司都有簽師弟妹，冇話大唔大師姐嘅，我仲有個師兄（狄易達），好多嘢都仲要請教佢！」

師弟似李璨琛

而新人王顯聰獲Rainky大讚似翻版李璨琛，問到阿聰會否以李璨琛為目標，他說：「我梗係想做到好似李璨琛咁出色，目標係做搞笑嘅喜劇演員。但如果有其他角色畀我試我都會去試去學，我鍾意搞笑，人哋又睇得開心，何樂而不為！」

而Rainky除繼續作歌影發展外，更投資六位數做「飲食天后」：「今年試吓搞小生意，投資咗六位數落茶餐廳，希望可以學吓嘢。」而身為狄易達舞蹈學校導師的阿聰則表示舞蹈學校將會擴張。