港姐冠軍張名雅端莊可人,自然不乏裙下之臣追求,但慢熱的她不停派檸檬,多年來只認真拍過一次長拖,她強調並非「戀愛大過天」的少女,揀男友要慢慢揀,不怕繼續「守Dry」,希望一擊即中揀個好男人。

Carat雖然多人追,但慢熱的她卻不停請人食檸檬。

只拍過一次長拖的Carat希望一擊即中,找到好男人。

同屆的心穎(左)及千雪(右)已在劇集亮相,貴為冠軍的Carat亦首嘗拍劇滋味。

Carat在港姐決賽中狀態大勇,最終摘下后冠。

Carat(左二)在《搵個好男人》中未有找到真命天子。

初次拍劇的Carat與吳啟華合作。

搞笑一樣掂:趣致賣萌
身為港姐冠軍的張名雅其實相當玩得,被要求Chok出幾款搞笑表情,她即大方放下形象交足功課,性格爽朗得意。

扮嬲嬲豬

好驚驚唷

鬥雞嘟嘴

Carat長髮Look大方得體。

港姐冠軍張名雅(Carat)孭着后冠榮銜,節目中總是大方得體斯斯文文,但其實她個性外冷內熱,經常自拍得意Cute樣冧Fans,不少網友都被其不拘小節的性格俘虜!外間總以為靚女必定桃花旺盛,但原來Carat已單身近四年,年初時她亮相速配節目《搵個好男人》,Fans都戥她心急,但Carat自言並非「戀愛大過天」的少女:「當年喺溫哥華讀書,真係諗住專心學業,我比較遲熟,身邊朋友都開始化妝、着高踭鞋,但我仲好男仔頭,到17、18歲,阿媽叫我化吓妝,我先試。」

最愛浪漫

學懂化妝的Carat蛻變成耀眼天鵝,引來不少狂蜂浪蝶追求,但Carat不相信一見鍾情,狂向裙下之臣派檸檬,提到最深刻一次,她說:「記得有年情人節有男仔約我,其實佢合晒我嘅要求,但我當時唔想拍拖,於是講大話話好夜唔出街,點知佢去咗我屋企樓下擺低一大束玫瑰花同頸鏈,其實都幾難忘!另外有啲男仔追咗我兩、三年,我都冇應承。」

19歲初戀

雖然不斷拒愛,但Carat其實很享受被追求:「邊個女仔唔鍾意浪漫?」及至19歲,她才被相識多年的同學打動芳心展開初戀,惟分手後她一直保持單身,刻下的她一點也不心急:「我唔係一定要拍拖嘅女仔,就算冇伴都OK,我喺香港有好多表弟表妹,唔會寂寞。」不過Carat仍大方描述擇偶條件,先說外形,五呎四吋的Carat表示一定要比她高,這點應該不難:「另外身形唔要太瘦,亦唔要太大隻,唔一定要靚仔,順眼就得,我比較欣賞男仔唔係貪人靚女先接近,人係會老,要睇入面。」說到內涵,Carat表示好男人要愛錫家人、為人誠懇及不吸煙,問到會否甘願與男友捱窮,向來不愁衣食的Carat交出一個合理答案:「佢唔一定要好有錢,但要有學歷,咁佢都可以靠努力創一番事業。」

首次拍劇

事業方面,與Carat同屆的亞軍黃心穎及季軍朱千雪已開始在劇集中擔任重要角色,外間不免把她們三人作比較,名雅未有介意落後,還承諾會繼續努力,做好主持工作。早前她終於「守得雲開」初次拍攝劇集《再戰明天》,更與心穎及千雪同劇,非常有緣!她表示與吳啟華有不少對手戲:「我飾演一個外國返嚟嘅女仔,同啟華有約會戲份,佢知我第一次拍劇,會同我傾偈,問我緊唔緊張,同心穎、千雪同劇感覺好得意,不過冇乜同場,希望遲啲多啲對手戲啦!」而Carat去年曾主持節目《姊妹淘》,亦曾跟汪明荃及曾志偉合作做騷,獲益良多。

後記:長髮又得短髮又得得咗

入行兩年都留有烏黑長髮的名雅去年底毅然轉Look,短髮感覺煥然一新,她亦希望嘗試不同造型,跳出港姐框框:「其實我細個幾男仔頭,到高中先開始留長頭髮,咁港姐係適合長髮,卸任之後就想試吓新形象,我想再短啲!但髮型師勸我逐步逐步嚟。」問到覺得長或短髮較好看?名雅自信十足地表示短髮感覺清新爽朗,長髮端莊又多變化,一樣咁靚,大家又點睇?