日模山內藍前晚出席電影首映時表示，滿意外界對其寫真的反應，更寸爆「同鄉」日模清穗久美子銷量報大數！另一邊廂，47歲女星溫碧霞昨日以Pink Lady打扮到書展力谷慈善寫真集，又自誇作品有美感及氣質，不屑與o靚模相提並論！　

山內藍同胞一樣冇情講，寸爆清穗久美子銷量不可能達一萬本。

清穗久美子

溫碧霞年近半百風情不減，以氣質及韻味秒殺o靚模。

山內藍與肥腸出席首映時自誇多廣告拍。

參與寫真戰的日模山內藍（Blue）和拍檔徐浩昌（肥腸）前晚在尖沙咀戲院出席電影首映，他們對寫真銷量甚有信心，對於有o靚模扮露點博宣傳，Blue直斥反感：「我唔鍾意！有人好似咩都唔着，好似拍AV！」提到同是日本人的清穗久美子寫真大賣一萬本，山內藍竟「自相殘殺」暗寸報大數：「佢喺日本都賣唔到一萬本，香港少人咁多都賣到？我哋要拍兩個廣告，冇時間宣傳，人哋有大把時間宣傳，所以我唔覺得自己輸！」

溫碧霞不屑鬥o靚模

而溫碧霞（Irene）昨日身穿粉紅色低胸裙到書展宣傳在希臘拍攝的慈善寫真，她希望新書可籌得一百萬元，幫助至少三百名內地患眼疾的兒童。問到銷量，她表示昨日才返港，故未知實數，但老公已自掏腰包買100本，問到老公有否因她太性感而詐型？Irene說：「係美感、氣質、靚景！都唔係太Sexy，最多只係露背。（同老公再去希臘？）上次佢冇去，當地好浪漫，都想同佢去一次。（介意人哋將你同o靚模比較？）我唔會比較，唔同女仔有唔同味道，我唔係刻意性感。」問到在希臘拍攝期間被扣留一事，Irene解釋：「唔係扣留，係太多衫行李超重，本來要罰兩萬幾蚊，但當局知我哋做善事，減到只罰二千蚊。」寫真內，Irene在希臘特色建築物前拍照騷熟女魅力，又化身希臘女神和柯德莉夏萍，更有穿低胸裝及床上露背相，美感十足！