Liddy獲邀親身重演啟晴邨槍殺案並在考慮當中，其好友及拍檔各有睇法，但大多不贊成，怕勾起Liddy的傷心回憶！

蕊蕊

裕美

王淑玲

錢國偉

與Liddy同為「Sing之天使」的蕊蕊說：「搵佢拍唔係咁好囉！邊個想諗番起啲唔開心嘅嘢？仲話案件重演，對當事人好殘忍！（梁思浩話Liddy考慮緊？）如果係我就唔會拍，但唔知Liddy點諗！」她透露自Liddy父親出事後仍未能聯絡她，故不知對方動向。

Liddy好友裕美說：「如果件事影響同傷害佢好深，當然唔贊成，因過程中一定勾起好多唔好嘅回憶。唔知佢依家心情點，如果佢真係有興趣拍會支持同尊重。（覺得請Liddy重演係抽水？）好多都會真人真事改編，但好少搵番當事人。」

曾與Liddy合作的藝人王淑玲說：「最緊要睇佢意願囉！要佢過到自己嗰關，最緊要佢開心！（怕唔怕佢觸景傷情？）如果佢接得，我相信佢會接受到，如果佢真係拍，我會覺得佢好勇敢，會睇同會支持！」她透露仍未能與Liddy聯絡。

因「Sing之天使」而曾與Liddy合作的導演錢國偉說：「呢種社會問題嘅題材，作為導演我好明白係充滿戲劇性同商機，但呢件真人真事係屬於私人同感情問題，而且冇頭冇尾，需要將成件事用話題去包裝，以我個人喜好係唔會拍。」