基仔啜氹老婆火箭造人
古巨基與助手Lorraine（陳英雪）日前秘密成婚，昨日是婚後首次公開出席開幕禮，被當「玩新人」咁玩！基仔全程落足嘴頭氹老婆，咀額頭又碰杯，提到生仔，他笑言會「開行Turbo開火箭」！
情深一吻
基仔兩度深情咀Lorraine，雖然唔係幾到肉，但老婆已經冧晒！
基仔多角度晒婚戒，幸福得佢呀！
似足擺酒
現場大放氣球，基仔與Lorraine企正中間，唔講以為擺緊婚宴。
合巹碰杯
因為Lorraine太怕醜，最後與基仔由交杯變碰杯。
收龍鳳鈪
Mani「送大禮」賀基仔雙喜臨門，睇真啲原來係麵包嚟！
不少缺席好友送花籃賀基仔新店開張，包括老闆楊受成、Twins及郭富城等！
日前宣布與拍拖20年的女助手Lorraine於拉斯維加斯註冊結婚的古巨基，昨日出席由他送給老婆於中環的餅店之開幕活動，一對新人婚後首次公開露面。基仔雙喜臨門，一班好友當然力撐，出席嘉賓包括經理人霍汶希（Mani）、傅明憲、周慧敏夫婦、湯怡、鍾舒漫及衛詩雅，並吸引逾半百傳媒採訪。
全場西餅任食
擔任司儀的森美先代傳媒追問基仔婚後心情，他坦言很開心：「好興奮！尤其啱啱成家立室，今日餅店又開張，雙喜臨門！」當他豪氣地宣布麵包西餅任食時，即被森美取笑當擺埋婚宴，但基仔藉機宣布：「婚宴應該出年先搞，今年自己較忙。」森美隨即取笑他太忙未有時間「造人」，基仔尷尬指會分配好時間，又趁機冧老婆：「咁甜品當然唔夠我哋咁甜啦！」
席上，Mani送上一對麵包製的龍鳳鈪，Lorraine在徇眾要求下以壓軸嘉賓身份現身，引來全場哄動，「咀嘴」聲更此起彼落！甚為怕醜的Lorraine獲老公基仔親吻髮頂，惟全場不肯收貨，基仔在Mani「指導」下再錫太太額頭，還肉麻又搞笑說：「呢度好，呢度有粒暗瘡，等我幫佢啜晒出嚟！」及後，Mani未有放過每個「玩新郎」機會，叫一對新人以甜品杯合交杯，嚇得Lorraine四處以眼神求救，最後僅以「碰杯」代替。
滿頭大汗的基仔獨自接受訪問時大晒婚戒，被問到是否三喜臨門？他說：「唔係！雙喜啫！係開新店同啱啱結咗婚。」他又坦承結婚事出突然：「突然有呢個念頭，想畀個驚喜佢，所以唔係籌備咗好耐。因為日日對住佢，有好多嘢要偷偷進行，都係靠朋友幫手。」問到會否生BB時，向來喜歡小朋友的基仔說：「交畀上天安排。（開行Turbo？）會！開火箭！」他又透露明年在港補擺喜酒，但仍未確實日子，當問到是否由英皇老闆楊受成包起酒席時？基仔不客氣地說：「相信佢唔會畀到我埋單，都要多謝佢。」
聽誓詞眼紅紅
另外，基仔又分享在美國拉斯維加斯結婚時的感動過程：「我哋喺一間小教堂舉行，由外國人致詞時，佢聽到眼紅紅，我都有。」並透露當時有八、九人見證，但因老人家怕坐長途機，故雙方家長未有同行。對於有否送鑽戒等問題，他冧笑說：「我哋有默契，最重要係彼此守喺對方身邊，係咪好Sweet呢！」提到為何剛才未有Kiss老婆時，基仔笑指Lorraine對着鏡頭太緊張，又踢爆老婆影婚照時要由他任導演教如何笑，記者取笑兩人要在家影多啲，基仔即笑說：「影啲咩先？（你想影咩先？）哈，影沙龍！」
