樂隊享樂團深明享受及玩樂之道，就算去旅行亦要試玩最新鮮及過癮的活動！主音旨呈與Bass手阿Paul早前到新加坡旅遊時，不但四處品嘗美食，更玩盡當地最刺激的水上活動，即使事後疲倦不已亦相當值得！

旨呈High爆飛上高空三十呎，你準備好未？

阿Paul（左）與旨呈潮玩「Jetpack」，玩到攰仍高呼值得！

旨呈極力推薦聖淘沙新興的水力推動飛行器「Jetpack」：「成個概念嚟自小時候睇嘅電影《占士邦》，可以令使用者飛到三十呎咁高，我一見到就即刻去試玩！」

由於「Jetpack」要飛至三層樓高，所以其安全設備絕對不可以馬虎，阿Paul說：「試玩之前必須上二十分鐘嘅課程，學習點操作，真正落水玩嗰時要帶對講機，方便隨時同指揮中心保持通話！」

作為新手的旨呈拖着千斤重的「飛行器」，笑言要多番嘗試才能成功飛天：「個感覺就好似太空人咁，好刺激，不過代價就係玩完之後真係好攰。」

雖然玩到筋疲力盡，不過他倆一致認為，要享受過刺激，才算是旅行的最大意義！