「外表Lady、內裏Man爆」的文恩澄最近被投訴太重剛陽味，故特地向好友珠寶設計師Edery Wong偷師，自言手工藝零分的她挑戰整首飾，由繪圖、倒模到鑲石均一腳踢，成功做出心形水晶頸鏈，女人味即時出晒嚟！

經理人投訴文恩澄太Man，點醒她發奮學整首飾，做個好女人！

完成作品後，Edery Wong為文恩澄戴上心形水晶頸鏈，即刻靚晒！

自嘲冇藝術天分的文恩澄，細心聆聽珠寶設計師Edery Wong教整首飾的秘訣。

Step 1

Step 2

Step 3

Step 4

Step 5

Step 6

Step 7

唱作歌手文恩澄（Rannes）活潑好動，自幼便愛上樂器、語言及電腦等興趣班。雖然外表少女味十足，但原來她情傾男性化活動，除識玩結他、小提琴、口琴及色士風外，早年更學過跆拳道及Hip Hop舞蹈，其後轉戰幕後亦為MV及微電影執起導演筒。

不拘小節的Rannes坦言近年被男性朋友與經理人投訴太「男人」，驚覺要做番個女人：「做幕後好似導演同剪接咁，女仔嘅Image就更加唔使咁深，所以做番自己都冇乜所謂！但早排前男友打電話畀我，話最擔心我太男仔，叫我唔好咁Man。後尾諗落都覺得女仔啲着數啲，所以着衫同談吐都開始似番個女仔。」為了擺脫男性化形象，Rannes專誠向珠寶設計師好友Edery Wong偷師學習製作首飾，挑戰自己的弱項。

冇藝術天分

Rannes自言勞作天分奇差，就連畫一個簡單的心形都會又歪又斜，她說：「我好鍾意周圍搵唔同嘅嘢學，大個咗就想學啲平時自己唔叻嘅嘢，所以就諗到學手工藝品。呢方面對我嚟講難度非常高，我份人唔係好細心，但珠寶設計要好細緻，要練耐性、細緻程度同觀察能力，希望學完個人會有進步！」

Rannes透露目標是成功做出一件既美觀亦不失禮的飾物：「整珠寶送畀男、女朋友都啱，將來送畀男友又得！其實細個作曲送畀男友多，又試過做畫冊畀男友，裏面有晒我哋拍拖嘅點滴，好似戲票、合照同說話咁，但我嘅手工藝好差好核突。」

步驟

Step 1：用顏色筆及間尺在紙上畫草圖，準備給師傅做銀模，由於時間關係，當日預先準備好心形銀模。

Step 2：利用銀模複製多個膠模，以便大量「生產」吊墜，接着注入熱溶蠟待涼。

Step 3：將成形的蠟模砌成蠟樹，再倒入石膏粉，然後放入高溫焗爐內烘焙一晚。

Step 4：將已熱溶的銀或金倒進石膏模內，待金屬（吊墜）涼透及成形後，剪斷水口棍，再將它磨至平滑。

Step 5：以陰力用鉗夾起鋯石，再用放大鏡檢查有否瑕疵。

Step 6：確認冇瑕疵後，利用索嘴黐起鋯石，並將鋯石鑲在吊墜上。

Step 7：完成後，將吊墜穿在銀或金鏈上，一條「DIY心形水晶頸鏈」便大功告成！