樂壇天后容祖兒昨日出席置地公司「香港製造」紙糊熊貓展覽開幕儀式，她自爆一直有催促老友古巨基早日成家立室，並踢爆他將於明年擺酒：「賀禮送啲可以催生嘅，可能多仔佛嗰啲。」問到何時與男友劉浩龍（師兄）拉埋天窗？祖兒說：「又唔心急，佢哋拍咗廿幾年先結婚，我可以畀多少少時間去觀察，幾年囉。（認定佢係結婚對象？）唔好講到咁定好喎！」而師兄前晚擔任音樂人Eric Kwok音樂會嘉賓時，唱罷《爛命鴛鴦》後遭對方取笑：「幾年前你失戀要我寫歌畀你，當時你唱到勁慘，今日唔係嗰種感覺！不如唱祖兒首《華麗邂逅》。」

紙糊熊貓咁Cute，祖兒着裙都不介意踎低合照。

蜜運中的劉浩龍被取笑唱失戀歌冇Feel。

另外，近日有不法分子假扮基仔在Instagram開設帳戶「呃Like」，結果有近五千名粉絲上當，包括鍾舒漫，昨日該網民被發現是假冒後即刪走所有照片，並上載「屎相」狂鬧基仔的粉絲。