音樂人郭偉亮（Eric Kwok）的作品展星光熠熠，Eric與嘉賓大放笑彈，搞鬼的陳奕迅（Eason）連老婆徐濠縈都擺上枱玩埋一份，借跑步暗笑老婆平胸，認真大膽！

笑老婆平胸的Eason High到擘髀，因住返屋企要跪玻璃！

Eric大讚媽咪偉大，並送上親手製作的戒指。

葉佩雯落力獻唱，在台上險仆！

Kary拎住狀似「雀仔」的按摩器勁尷尬！

Eason胸襲Eric，莫非比較緊Eric同阿徐嘅上圍？

千嬅獲Eric送上三點式，笑到肚都攣！

郭偉亮一連三場的《我最喜愛 Eric Kwok 音樂會》前晚揭開序幕，獲老婆葉佩雯及大班好友擔任嘉賓支持，包括陳奕迅、張學友、葉蒨文、梁漢文、蘇永康、許志安、劉浩龍、楊千嬅、吳雨霏（Kary）、林欣彤（Mag）和老拍檔Jerald等。

向來玩得的Eric跟Eason、康仔等互窒放笑彈，康仔演繹Eason的《當這地球沒有花》時，把最後一句歌詞改做「當這地球沒有Bra」，然後問Eason：「如果冇發明胸圍咁會變成點？」Eason即自爆以前很留意別人的胸部：「跑步嗰啲，如果冇呢樣嘢會唔平衡。」隨即扮沒戴胸圍的人彎腰跑步，康仔即抵死地再問：「尊夫人如果跑馬拉松，應該冇咩影響。」Eason即說：「都係！」然後扮作若無其事跑步，暗笑老婆徐濠縈平胸，引得全場大笑。

Eason、康仔、梁漢文、許志安和劉浩龍又扮評判評審Mag的唱功，「行貨」地讚好，Eric不禁說：「你班禽獸見人哋女仔就乜都好！」康仔則笑指其他評判「裝」Mag的裙底，相當抵死。Eric跟每位嘉賓互送禮物，送了貌似陽具的按摩器給Kary，令她尷尬傻笑。而一向身材平平的千嬅卻獲贈火辣三點式，Eric擺明玩嘢！

Eric送戒感動媽咪

玩完嘉賓後Eric則大騷溫情，指當年爸爸爛賭導致媽媽要把珠寶賣光還債，當場送上親手製作的戒指給媽媽，令她感動到眼濕濕！Eric又大讚老婆令他成為最幸福的人，並與葉佩雯拖手合唱。他提到去年過身的爸爸時，一度哽咽眼濕濕。

另外，當年憑《囍帖街》唱得街知巷聞的謝安琪（Kay）前晚未有現身，Eric在台上說：「謝安琪話真係好想好想嚟，不過之後佢經理人又話佢嚟唔到喎！」事後Kay的經理人夏森美解釋是檔期問題。至於捧場的謝霆鋒被指在節目《十二道鋒味》中爆粗，對此經理人霍汶希說：「內地工作人員可能聽唔明香港粗口，以後會有專責小組跟進。」