超級球迷李克勤帶太太盧淑儀、父親和外父到巴西睇世界盃，因當地治安欠佳，又有偏激球迷醉酒鬧事，肩負照顧家人重任的克勤，睇波如走難，出街時以「人肉鎖鏈」的方式互相照應，更自行宵禁。

當地趁世盃舉行熊展覽，克勤與中國熊公仔合照。

克勤睇波梗帶埋老婆盧淑儀，廿四孝老公當之無愧。

克勤、盧淑儀、陳貝兒及兩老在沙灘欣賞季軍戰。

克勤在高舉雷米金盃的雕像前親吻「大力神盃」。

巴西治安欠佳，克勤帶太太盧淑儀、父親及外父睇世界盃，要肩負起照顧家人重任，四人走在街上時手拖手，互相緊扣，恍如「人肉鎖鏈」，克勤接受長途電話訪問時說：「我哋睇完波（季軍賽），叻哥（陳百祥）話請飲嘢我哋都唔去，喺呢度治安係有需要少少擔心嘅，基本上我哋啲袋、背囊都孭喺前面，大家手拖手。入場睇決賽就連袋都唔帶，盡量圍埋一齊。」

警察巡邏

雖然巴西輸波，但克勤覺得巴西球迷完全冇問題，他說：「反而阿根廷球迷開始喺街度叫囂，群情洶湧，有啲飲醉酒，有啲比較節儉，冇乜錢。佢哋揸車揸好遠上嚟，夜晚會瞓喺車，真係要小心啲。」前日他與家人和無綫攝製隊在里約熱內盧的沙灘露天欣賞巴西對荷蘭的季軍戰，談到早前有人在沙灘睇波遭集體打劫，克勤說：「我唔知，唔知好過知，我見到好和平，巴西球迷比我印象中Nice，唔係過分偏激，比較偏激嘅係阿根廷球迷，當然比起以往我哋去睇過嘅世界盃英格蘭球迷，只係蚊髀同牛髀，加上喺路邊有相當多警察，又有直升機喺上空盤旋，其實好安全。」

克勤以三個小生來形容自己與父親及外父：「我老竇、外父都係第一次喺現場睇世界盃，山長水遠，搭飛機連轉機，足足用咗31個鐘頭，但都係值得。」他自爆逼老竇及外父穿上巴西球衣，又興奮地畫花面，他說：「呢啲嘢應該係佢哋人生當中冇乜幾何出現過。」

搶購拖鞋

德國對阿根廷的冠軍戰在里約熱內盧的馬拉簡拿球場舉行，入場睇波的克勤在球場外拍照留念，他笑說：「我後面就係巴西當年贏咗三屆世界盃，擁有嘅雷米金盃雕像。」克勤又自爆搶購巴西膠拖鞋做「手信」，他說：「最好笑係嚟到巴西，唔係買世界盃精品、波衫，根據陳貝兒嘅指引，原來最抵係某H字頭嘅膠拖鞋，香港買幾舊水，呢度減到港幣三十幾蚊，昨日我哋第二次去衝刺掃貨。」而同在當地睇波的阿叻及譚詠麟睇波之餘，也爭取時間吃喝玩樂。