前國際中華小姐冠軍朱璇魅力沒「法」擋！早前她到法國旅行時有艷遇，遭關員搭訕，對方更給她電話號碼，雖然她沒有致電對方，但大感浪漫！

化身阿根廷「足球寶貝」的朱璇為美腿熱身拉筋。

肥番的Alice B.精神奕奕，頂波都零舍落力！

朱璇玩遊戲都不忘保持儀態，果然選美出身！

吳日言（左起）、Alice B.和朱璇三個靚女趷籮擺甫，Wow！索呀！

前華姐冠軍朱璇、藝人吳日言和混血模特兒Alice B.，昨午出席在黃埔新天地舉行的《世盃決賽派對熱爆黃埔 前哨派對》。三位靚女均以迷你裙上陣，性感誘人，又與現場觀眾大玩足球遊戲，氣氛熱鬧！朱璇談到早前與懷孕5個多月的老友陳爽遊法國及西班牙：「仲同埋陳爽老公一齊去。（你咪做電燈膽？）係呀！Plan嘅時候佢未有BB，後嚟佢老公想照顧佢就一齊去。陳爽都有同我哋食海鮮，係生嘢唔食得啫！我哋又去咗波爾多，喺當地梗係要飲紅酒，不過陳爽唔飲得，睇住佢老公同我飲，都幾殘忍！（你做BB契媽？）做契姐啦！有少少接受唔到自己做Auntie。」

提到有指西班牙男士很熱情，朱璇卻覺得法國男士更熱情，她說：「喺法國過關，個職員幫我蓋印時同我傾偈，開頭以為佢只係問吓我嘢，點知傾咗好耐，後面排隊嘅人都話可唔可以快啲，最後佢仲畀咗電話號碼我！（有冇打畀佢？）冇，不過都覺得幾浪漫。（接唔接受到異地戀？）睇吓幾遠同幾耐見一次，如果我多啲返法國都OK，但一年一至兩次就唔得。我依家傾緊套法國藝術電影，係美國導演嘅，我個角色係一個媽咪，要講普通話同法文，我喺TVB套劇都係做媽咪，可能做開就要繼續做。」

Alice B.肥番

而容光煥發的Alice B.透露兩天前剛從英國探完媽咪返港：「媽咪上年病得嚴重，佢見我返去好開心，我都開心！我終於肥咗，之前擔心媽咪所以大壓力瘦晒。（感情生活？）依然單身，有同人約會，但仲掛住前男友。（想拍散拖定要穩定關係？）唔知，不過我咁後生都想Have Fun。」吳日言則坦言在香港娛樂圈10年，不會再有期望，現在主力做生意，反而會向內地娛樂圈發展。