娛樂圈向來最講際遇,有實力但苦無機會的演員大有人在,三年前畢業於香港演藝學院的賴慰玲(Winki),由舞台劇走到螢幕,當中經歷過無數人生交叉點,但慶幸有貴人相助,Winki首次參與無綫劇集即大獲好評!而恨嫁恨出面的她,原來隨時Ready結婚生B。

Winki感激家人及男友的支持,並希望盡快結婚生B。

Winki

Winki讀小學時已參演舞台劇 ,可謂經驗豐富。

七位美少女在《女人俱樂部》的演出令人讚賞。

張慧儀、賴慰玲

忙於演舞台劇的Winki承諾有空會重返校園教育下一代。

踏上演藝路

天生與演戲結下不解緣的Winki,早前在無綫劇集《女人俱樂部》中飾演「嫩版張慧儀」(珍妮),其巴辣率真的性格,獲不少觀眾大讚個性鮮明突出。Winki小學時已參演舞台劇,中學加入戲劇學會,曾多次到外地與其他學生作戲劇交流,原以為「經驗老到」的她,中學畢業後會順理成章入讀香港演藝學院(APA),豈料她卻放棄這別人夢寐以求的機會:「讀完中五後,APA收咗我,但我覺得應該要讀大學,條路應該要咁行,所以我放棄咗。」中七畢業後,Winki再獲APA取錄,順利踏出演藝生涯第一步,這一切都似乎冥冥中有主宰。

Winki就讀APA時遇上令她徹底開竅的恩師:「冇羅冠蘭老師就冇我!每個老師都係我恩師,但佢一定係影響我最深,我一開始完全唔識做戲,亂咁嚟。佢教咗我四年,開頭佢直情係憎我,見親我都叫我:『Winki小姐,今日又點呀?做啦!』之後慢慢了解同溝通,發現我對佢有誤解,或者每人教學方式唔同,咁我覺得:『好!就試吓你嗰套!』,點知學完之後,發現得喎!到畢業時,我直頭覺得佢係我第二個阿媽,到依家我都成日請佢食飯。」

拍《女人俱樂部》內心掙扎

畢業後,Winki的事業經歷過高峰及低潮,去年Winki與逾20個APA同學去無綫Casting,結果只得她入選演出劇集《女人俱樂部》:「Casting題目係天才表演,我唱歌跳舞唔夠其他人叻,咪做戲囉,羅冠蘭老師提過我哋要熟讀人哋畀我哋嘅所有材料,咁我睇晒七個角色嘅性格描述,再做咗當中六個角色。」Winki主動的性格亦為她帶來機會:「到我Cast嗰陣志偉準備走,我叫佢睇埋我先,佢望一望我手上嘅道具,就放低個袋喺門口,坐番低睇我。」

三個月後,Winki收到通知中選,但又遇上另一人生交叉點:「嗰陣有劇團請我做全職演員,係爭未簽約,當時嚟緊可能要連續做兩個舞台劇,當時好掙扎,最後決定忍痛,去搵老闆娘講退出劇團,自己都講到喊晒,未試過咁樣應承咗又唔做,好彩佢兩個好明白,仲鼓勵我唔一定要局限喺舞台劇。如果當時佢哋Say No我會留番低,但佢哋冇,仲話好想我去試吓(拍劇),佢哋真係好錫我!」

家人男友無限感激

除劇團老闆夫婦與羅冠蘭外,Winki身邊總有不少貴人相助,而對於家人及男友,她更無限感激:「屋企畀咗我好大勇氣前進,好感激家人畀我喺冇負擔嘅環境下,做我鍾意做嘅嘢,男朋友都係,只要我鍾意嘅佢都好支持。」

提到與男友拍拖兩年多,感情穩定,Winki即難掩恨嫁之情:「我十幾歲已經想結婚生仔,依家隨時Ready,最好聽日添。」不過她慨嘆:「最閉翳係我哋冇經濟基礎,呢行好難做到,特別係舞台,做舞台如果你肯做,一定餓你唔死,但一定唔可以升官發財,冇可能買樓,一定儲唔到首期,就算做全職演員都未必儲到錢。同埋我哋唔係月薪,一個月有兩、三萬已經叫好好,有時係得兩、三千,咁點儲錢。講真結婚簽張紙唔難,但要組織家庭全部都係錢,如果想生小朋友,又要學費、奶粉錢,使喺小朋友身上唔想慳。」

生命教育

擁豐富舞台劇經驗的Winki,未拍劇時曾到中小學教Drama Education(戲劇教育),每次上堂,都志不在教戲,而是透過這種「生命教育」,令學生有所得着:「我好鍾意教Drama Education,覺得好有意思,例如我通過呢個Exercise(練習),叫學生Role Play(角色扮演)自己媽咪,你個仔默書唔合格,你會點做。咁學生喺扮鬧仔時,會明咗啲嘢,會知道平時媽咪係點諗,呢個係生命教育,我唔會話學生做戲做成點,只會諗完咗Exercise佢係咪有得着。」

除此之外,Winki又舉例:「有時用英文劇本,學生會學到英文,又或者排過戲,會學識紀律,明白原來人哋講緊對白要留心,呢個係基本尊重,有啲人可能未識,但會將心比己,學到做人,同埋Role Play時會了解到其他人。」雖然暫時Winki未能「重操故業」,但她坦言待工作安排穩定後,一定會返回校園教育下一代。

後記:自己揀Job樂逍遙

Winki每次都是「一支公」出席活動,今次專訪亦不例外。小記好奇地問為何不找個人幫手,她卻指很享受可以自己揀Job:「鍾意Schedule喺自己手,方便咩工作要做咩準備,例如我好清楚出活動幾多點,但可能其他女仔要問助手或者經理人先知。」不過隨着工作量增多,她亦希望能有個經理人:「始終我唔熟呢行,自己摸係刺激,但驚摸錯,有經理人帶住起碼會知啲嘢點做。」