何超瓊昨晨飛甩俞琤，往中環蒲吧睇世界盃，陳欣健的中性打扮女兒陳早茵陪伴在旁，兩人於酒吧貼頭密密斟，飲到面紅紅的超瓊少女味十足，甜笑着咬唇，離開酒吧時超瓊目光依然未離開陳早茵，最後與她一同上車離開。

超瓊趁世界盃期間蒲吧Relax。（資料圖片）

與陳早茵並肩而坐的超瓊（左）甜笑咬唇。

超瓊（前）與陳早茵一起登上座駕離開。

超瓊不時凝望陳早茵，唔驚有人呷醋？

本報年前獨家踢爆「瓊俞戀」，拍得何超瓊和俞琤蜜遊巴黎，二人返港後即變得避忌，人前人後均相當小心，一於寧畀人知莫畀人見。近日世界盃進入高潮，超瓊亦加入睇波行列，昨日凌晨更飛甩俞琤，到中環蒲吧睇比賽，而身邊人則換成喜歡作中性打扮的陳欣健女兒陳早茵。

飲到面紅紅

多年來同性緋聞不斷的陳早茵，這晚陪實超瓊睇波，不時施笑彈逗對方開心，兩人並肩坐在酒吧近門口位置，雖然同場有數名男女友人，但兩人甚為好傾，不時舉杯輕碰，更頭貼頭密密斟，只見飲多兩杯面紅紅的超瓊全程風騷笑不停，更一度少女味十足地咬唇，德國入波後現場球迷歡呼，超瓊亦露出燦爛笑容。

約凌晨二時，賽事結束後，現場球迷一哄而散，超瓊一行人亦埋單，步出酒吧，心繫陳早茵的超瓊仍然不時回頭望實對方，行至街頭，超瓊好客地請晒各友人登上俞琤名下的座駕，由司機接載齊齊離開。