「嫩版珍妹」王敏奕廚房Gathering

憑《女人俱樂部》中「嫩版李麗珍」朱莉一角彈起的王敏奕（Venus），早前與師弟組合PlayTime四位成員岑珈其、林耀聲、梁曉豐（Anjo）、黃溢濠大玩煮食派對，齊齊整Egg Benedict及沙律。

炮製愛的便當

廚藝了得的Venus及Anjo擔大旗，五人合力煮媲美西餐廳水準的菜式！Venus笑言煮Egg Benedict輕鬆：「平時我喺屋企15分鐘就整完！我平時鍾意煮嘢食！唔想喺出面食嘢，女Artist成日喺出面食飯盒對身體唔好！」常為家人下廚的她，被問到是否如報道所指要照顧全家時說：「我諗所有屋企人都希望可以Take Care番屋企人！咁都係盡女嘅責任！」

讚師姐好手勢

問到有否為男友曾國祥下廚，Venus說：「睇機會囉！有機會都可以嘅！」直到記者追問，她才甜絲絲承認：「都有！食嘢我覺得係最好嘅聯誼！」除了家人及男友，她亦為師弟PlayTime煮意粉及沙律打氣，而PlayTime亦大讚好味，但Venus卻自爆：「但係我聽過佢哋食完我啲嘢肚屙喎！」四子聞言即將肚屙根源歸究其他食物！而入廚功夫不弱的PlayTime表示，有個私人PlayTime Studio，四人更輪流煮早餐。

EasyChef W + Cooking Studio廚藝導師Sean Wong看過照片後，即大讚Venus及PlayTime合力炮製的Egg Benedict及沙律：「賣相OK！Vegemite我以前喺澳洲都有試過用，但香港就比較少人用，好特別！不過啲汁可以再『杰』啲，唔使太多汁。個沙律唔錯！配豆腐非常好！可以加多啲唔同類型嘅菜！」Sean又分享煮Egg Benedict的心得：「最緊要係個蛋！蛋白要整得Firm，煮嘅時候醋嘅分量要啱啱好，太多會酸同硬，太少又Keep唔到個Shape，好有技巧！一定要用新鮮嘅蛋，擺得太耐會好多水。點樣分新蛋呢？將隻蛋擺喺鹽水入面，沉底就係新嘅，浮面就比較舊。」

自家製作Easy Job

Step 1：用兩個蛋黃，加入30cc白酒並放於金屬盤中，坐於煲滾的熱水上，打至起泡（約3分鐘），加入125克已坐溶的牛油打成醬狀。再加入18cc新鮮檸檬汁、鹽、白胡椒、澳洲鹹醬Vegemite或頭抽，製成荷蘭醬。

Step 2：預備一煲約2公升、攝氏90度的熱水，加入50cc白醋，並在漩渦中間放蛋，輕輕搞動水邊，約2分鐘後撈起（一份要用一隻蛋）。

Step 3：烘香鬆餅，以牛油煎香厚火腿。

Step 4：將兩盒蒸煮豆腐及兩個蘋果切粒，混入雜錦沙律菜中，加入果仁碎粒、黑胡椒、白胡椒及橄欖油製成沙律。

Step 5：於鬆餅上鋪上菠菜、番茄、厚火腿及蛋，淋上荷蘭醬製成Egg Benedict，並將沙律放於旁邊。

半裸自白夢想

PlayTime四子最近密密在Studio排練，原來是為了一個宣揚追夢訊息的半舞台劇《大空想家》，阿聲更半裸上陣用15秒自白工作經歷，他道出曾做過的職業及演員夢。而Anjo在《曖昧》中與Venus談情，問到有否親密鏡頭，Venus說：「思想上好親密囉！可能觀眾會睇到好肉緊！」問到是否男友不批准親密鏡頭，她說：「工作上我影響唔到佢，佢都影響唔到我！」但在戲中周旋於Anjo及溢濠之間的她，卻不願透露情歸何處。

至於與另一女神溫碧霞在電影《做地產》中合作的珈其說：「我完全畀佢嘅魅力吸引住，忍唔住加咗句對白『你好靚呀！』，佢都忍唔住笑！」更令對方即時面紅。

最後，作為師姐的Venus力撐師弟形象健康：「佢哋畀人嘅感覺正面，可以為一班年輕人發聲！」