無綫重頭劇《巾幗梟雄之諜血長天》被視為今年台慶劇，昨日《好報》報道當中一場被高層下令禁拍的雞姦戲，居然有人照拍，觸怒無綫總經理李寶安，硬蝕1,500萬亦寧願大手刪剪15集，令男主角黎耀祥四奪視帝之夢危危乎。

祥仔不介意新劇是否台慶檔，認為最緊要觀眾鍾意睇。

《好報》報道祥仔主演的《巾幗梟雄之諜血長天》被大幅刪集數。

無綫《巾幗》系列向來收視、口碑俱佳，由金牌監製李添勝「主理」，而黎耀祥亦憑此系列連奪視帝殊榮。今次第三輯《巾幗梟雄之諜血長天》由祥仔夥胡杏兒「孭飛」，二人拍攝時相當辛苦，杏兒坦承壓力爆煲。不過，據知劇中一幕祥仔童年被雞姦的場口，早已被高層下令禁拍，但聲稱中蠱及拍到想死的李添勝卻當耳邊風照拍，無綫總經理李寶安得悉後大為震怒，為保聲譽，將原本30集刪剪為15集，帳面已蝕掉1,500萬元，據知李寶安更召見戲劇科總監曾勵珍及其頂頭上司區偉林問話。

《巾3》一場「雞姦戲」慘令無綫蝕大錢、白費演員努力，對此，記者昨日致電無綫助理總經理區偉林，他說：「唔係淨係因為一場雞姦戲，全套戲我哋要睇多一啲先，睇吓係咪有啲場口要剪，依家仲係好模糊，要再檢測吓先！」

另有台慶劇名單

說到原本此乃台慶劇，現時台前幕後心血盡毀，區偉林即說：「從來冇話係台慶劇，冇鎖定過，當然我哋係有一啲心儀嘅名單，但要睇拍出嚟嘅效果。（咁台慶劇定咗邊套？）依家未有定案。」對於製作上硬蝕1,500萬元，他續說：「唔係咁樣計，每個出產我哋都要QC，呢個係我哋責任，對觀眾唔好嘅，我哋唔會播！（呢件事有冇人要負責？）冇人要負責，向來創作嘅路交畀同事，唔會太干預，只係有時劇本意識唔係好配合，會有少少意見。係咪套套劇都要有強姦、雞姦場口呢？唔適合、過咗位咪做過。」

而祥仔對於《巾3》未能成為台慶劇不感可惜，並說：「拍時根本唔知係咪台慶劇。（可能周六、日時段播？）《衝上雲霄》都唔係台慶劇，星期六嘅好似《飛虎》咁收視都好好！最緊要入屋、受歡迎。」問到此事可能令他無緣「四奪」視帝，他即說：「都係嗰句，最緊要觀眾鍾意，觀眾鍾意睇就得。」