若琪兩年前喪父，父女情深的她幾近要停工平復心情，哭過痛過後，日子還是要過，今年她重整旗鼓，再推新歌《表情》，為自己曾經淚流不止的臉龐掛上一個釋懷的笑容。

若琪調整心情，在音樂路上重新出發。

若琪坦言以前的負面情緒較多。

現時的若琪面上多了一絲笑容。

若琪坦言從前是一個負面情緒較多的人，反而經歷喪父之痛後，有了新的體會，她說：「其實2012年我啱啱出第二隻專輯嗰時冇耐，就得知爸爸有肺癌，連帶所有宣傳都唔想做，連有Show出都唔想做，想留多啲時間陪屋企人。爸爸嗰時好瘦，得番70幾磅，唔可以做化療，真係好絕望！我同爸爸關係好Close，佢嘅離開對我打擊好大，但佢嘅事令我覺得只要你仲健康，就咩問題都唔係問題。」

要將悲憤化為力量談何容易，若琪用了兩年時間來調整心情：「呢兩年畀我一個好好嘅原動力，為咗小事唔開心係好無聊，所以今年開心積極咗好多，令我覺得失戀歌可以唔再係死人冧樓，希望經歷咗慘痛之餘，會喺入面得到正面訊息！」

四圍收集表情

為了新歌《表情》，若琪發起了收集表情大行動，收集各人的表情，Bob也落力支持。她則特地到九龍城尋找飛機欖嬸嬸：「大家都知原本掟飛機欖個叔叔過咗身，嬸嬸同我一樣失去親人，但佢好有正能量，佢啲秘製飛機欖係伯伯教佢，雖然依家冇咩人買，但佢每日都整。我就問佢可唔可以拎你一個笑容，我想講生命嘅完結唔代表愛嘅終止，有啲嘢永遠會喺心，就算爸爸走咗，我都依然會記得佢講過嘅嘢，記得佢點拖住我，呢啲愛係唔會走。」