世界盃賽今晚進入八強賽，法國大戰德國及巴西強攻哥倫比亞，昨日出席無綫七月藝人生日會的馬賽講明捧德國隊：「一開始已經睇好佢哋，實力平均之餘仲比較高水平！」同場的樂瞳則力撐荷蘭：「之前睇荷蘭對墨西哥嗰場，我哋成班朋友睇到好有火藥味！」至於李逸朗卻預測荷蘭八強或四強止步，力撐主辦國巴西：「今年巴西贏啦！其他球隊喺咁熱嘅地方都發揮唔到水準。」

馬賽熱捧愛隊德國砌低法國殺入四強。

另外，有讀者爆料指節目「低俗講波團」中三位「世波女」張芷瑜、伍珠紅及李珈立到夜場工作，收費電視行政總裁杜之克說：「唔使亮相嘅女仔係可以出去接工作，但如果用『低俗講波團』作招徠，咁就要視乎有冇傷害個名聲同商業上有冇利益牴觸，會保留追究權利。」