形象豪邁爽朗的張文慈（Pinky）出道至今都予人「好劈得」的錯覺，實際上卻是長期滴酒不沾之人！兩年前，她在朋友「引導」下戀上紅酒，最近修讀Wedding Planner課程時更考獲品酒初級證書，她笑談「新歡」：「我鍾意用紅酒比喻人生，都係嗰句：『愈擺愈醇！』」

酒量不佳的Pinky近年愛上紅酒，更以好酒論人生。

單身的Pinky深信愛情會如眼前的紅酒般「好酒留最後！」

Pinky考獲品酒初級證書，但暫未計劃將興趣發展為事業。

這支來自法國波爾多Saint Emilion的紅酒價值千多元，由酒莊限量生產，全球只有1,000支。

Pinky修讀課程時與紅酒專家張先生結緣，獲對方傳授不少相關知識。

相約Pinky拍攝家中收藏品，當然少不了即席開酒淺嘗，豈料兩杯到肚，伊人臉頰已開始泛紅兼大叫：「唔可以喇！驚醉咗做唔到訪問！朋友一向以為我好飲得，又懷疑我長期聲沙係因為飲得酒多，其實係啱啱相反，以前覺得啲酒又苦又難飲！」她愈說愈興奮，更說漏嘴自爆醉酒瘀事：「試過同晶哥（王晶）仲有肥媽上郵輪登台，之後大會招待我哋去夜場飲嘢。佢哋個個唔信我唔飲得，點知兩杯到肚我就瞓咗，醒番發現有幾十對眼望住自己，肥媽話：『我信你真係唔飲得喇！』」

最好時刻留到最後

兩年前，Pinky的閨蜜不時自備紅酒上門傾心事，備受薰陶下她亦漸漸戀上紅酒，加上有內地粉絲兼好友是紅酒供應商，間中寄來珍品供試飲之用，Pinky開始在家中設有小型酒櫃：「以前介意畀人知飲酒，依家發現原來飲紅酒都可以飲得好優雅！而且適量嘅紅酒對女仔有補身作用，最緊要係飲『開心酒』，如果諗住借酒澆愁就唔得喇！」她近年逐漸開放自我，被問及感情生活時坦言是「望愛的女人」：「喺呢方面仲有憧憬，一直相信『好酒留最後。』」

Pinky早前修讀Wedding Planner課程時結識了紅酒導師張先生，彼此亦會交流品酒心得：「呢方面嘅知識好似大海咁無邊無際，但整體而言，修讀呢個課程令我認清咗個人缺點，例如唔識得理財就係大忌。同埋我好似同社會脫節咗好多年，起初連PowerPoint都唔識用，真係蠢！」問到會否將興趣發展為事業，如代理紅酒品牌或學習釀酒？她說：「冇諗到咁長遠，只可以話好有興趣囉！」

速遞佳釀撐場

Pinky展示收藏品，自言並非名家的她亦沒有動輒上萬的名酒，但貴在情意：「個粉絲兼朋友做緊紅酒代理，成日都寄好嘢畀我試飲。佢知道我要做訪問即刻加單再運幾箱酒嚟撐場，點知無端端畀海關扣查，搞到趕唔切，佢知道後非常唔開心！」能夠由偶像及粉絲關係變做好友，更處處為她着想，Pinky暖在心頭：「有時人與人之間好奇妙，我喺內地有班好錫我嘅粉絲朋友，真係好感恩！」