張智霖昨日以亞太區品牌大使身份與任嘉賓的劉嘉玲出席腕錶品牌FRANCK MULLER旗艦店開幕活動，並擔任剪綵嘉賓。打扮密實的嘉玲剪綵時左胸竟隱約凸點，她透露活動後趕住綵排舞台劇《杜老誌》，故未能為52歲生日的老公梁朝偉慶祝：「要借你哋喺度同偉仔講生日快樂！（有冇提早慶祝？）冇。（畀Surprise佢？）Surprise係冇得同佢食飯。（佢啲Fans日前同佢慶祝咗？）係，Fans來自世界各地，每年都同佢慶祝，所以佢唔寂寞！（會送禮物？）準備咗，佢都會送畀我。」

事業心重的嘉玲剪完綵即往綵排舞台劇，連老公生日都冇符。

嘉玲指還要排練多兩個星期，更壓力爆煲致失眠：「耐唔耐就發忟憎、嘔、周身唔聚財，呢啲反應平時冇，依家瞓覺、行路同做運動都滿腦子對白。（偉仔咪要忍吓？）係呀！（佢忍到？）咪唔出聲囉，佢都準備緊同操緊，九月開新戲拍喜劇。我都要鍛煉好身體，演26場冇替身要好大體力，演一場都虛脫，暫時戒咗酒，等自己醒啲！」雖然未能與偉仔慶祝，嘉玲昨日卻在微博放上偉仔的童年照，並寫道：「愛不是改變對方，而是在旁守護，生日快樂！」隔空傳情，Sweet爆！