前港姐冠軍陳庭欣與緋聞男友翟威廉雖未有公開承認戀情,但前日二人又拍拖更出動,在男方寓所樓下的商場約會睇戲兼搵食醫肚,更趁人少少即拉近距離並肩同行兼3度手揩手,親密關係不言而喻!

陳庭欣戴上黑超與翟威廉行街,意圖掩人耳目,其實室內戴黑超仲顯眼!

鬼祟貼手
見人少少,陳庭欣和翟威廉先敢手背揩手背,作肢體接觸。

角落交流
翟威廉冧爆望實陳庭欣,有講有笑。

翟威廉不時四圍望,警覺性甚高。

陳庭欣和翟威廉研究水牌時企到離行離列,仲以為佢哋唔識!

臨開場前,陳庭欣和翟威廉匆匆步入戲院。

陳庭欣

翟威廉

前港姐冠軍陳庭欣(Toby)由2011年開始與前港男冠軍翟威廉傳緋聞,更曾被本報影到又翹又拖行商場,兼前往男方寓所「家訪」。去年Toby升呢為日式餐廳老闆娘時,翟威廉不避嫌在開張當日撐場,似足其「背後男人」!近年更有指兩人已半同居,惟雙方一直否認拍拖,堅稱只是好朋友,不過這對「好朋友」前日再被拍得在男方寓所樓下的商場「密會」!

見人即彈開

前日下午二時許,穿長裙戴黑超的Toby與染上一頭金髮、孭着大背囊的翟威廉到商場行街,在室內仍戴黑超的Toby分外惹人注目。據知他倆相約欣賞新片《變形金剛:殲滅世紀》,不過夠鐘睇戲前,兩人先在商場遊花園覓食醫肚,翟威廉沿路不時手指指,充當「導遊」為Toby介紹食店。由於撞正食晏時間,多間食店都排長龍,深怕被認出的二人一見「人龍」即掉頭走。

行到人少少的地方,兩人即按捺不住愈行愈埋,並肩同行時更前後三度肢體接觸,手「揩」手,態度親密!不過迎面有途人時,兩人即避忌彈開,前後腳行。Toby及翟威廉最後決定幫襯戲院內的食店,不過一見人多,兩人即化身陌路人,拉遠距離扮唔識,各有各睇水牌,待人潮散去,才雙雙於臨開場前一刻入場。

「成日去嗰度」

Toby和翟威廉傳緋聞傳足多年仍如此避忌,記者昨日致電求證二人關係,Toby表示當日只是行街沒有睇戲,因趕返工,很快便揸車走人,問到是否同居?她即例牌否認:「冇,成日都影到我去嗰度啦!(點解去佢屋企附近?)全世界都知佢淨係去鑽石山,唔去第二度!我不嬲都同屋企人住,影嚟影去都係我同佢行商場。(拍緊拖?)都係咁,大家係朋友。(多追求者?)都係咁啦!依家忙拍劇,冇時間理呢啲。(同翟威廉咩關係?)好好好朋友。」而翟威廉似乎已夾過口供,異口同聲否認戀情及同居:「我唔會去第二度,朋友都會嚟鑽石山搵我。(Toby被指同你同居!)我成日喺屋企搞Party都有人影到,係兩個人少啲囉!(二人關係?)冇特別關係。(名分?)佢都好多市場啦!」

水着煞食:陳庭欣

出身:2010年度香港小姐冠軍兼國際親善小姐及旅遊大使

年齡:26歲

身材:32.5、22.5、34

代表作:2011年與名廚黃永幟主持飲食節目《為食總司令》嶄露頭角,今年更因在劇集《愛.回家》中有三點式演出而令人眼前一亮。

8料港男:翟威廉

出身:2005年參選亞洲先生獲得亞軍,五年後轉戰無綫香港先生,並成為八料冠軍

年齡:29歲

身材:40吋胸肌

代表作:2012年參演馬德鐘主演的劇集《飛虎》而打出知名度,去年於劇集《衝上雲霄II》中飾演有型機師,與梁靖琪有感情線之餘,更與吳鎮宇及馬國明等有對手戲。

第一手消息請下載on.cc東網iPhone/iPad/Android/Windows Phone Apps