世界盃再出現精彩場面，烏拉圭前鋒蘇亞雷斯昨日咬傷意大利後衞基亞連尼，令人大為驚訝！張智霖直呼被怪行嚇窒兼失去睇波興趣，港姐陳庭欣懷疑他病態咬人，而周秀娜則戥基亞連尼慘，狂寸「哨牙蘇」應該食牛扒及雞髀發洩！

周秀娜怒插「哨牙蘇」，指球證應趕他出場！

星級球迷張智霖認為今屆世界盃賽果離奇，轉睇自己演唱會冇咁嬲！

昨日凌晨的世界盃死亡D組賽事中，烏拉圭以一比零險勝意大利殺入16強，並將意大利踢出局。但全晚最爆的一幕是烏拉圭前鋒蘇亞雷斯再度咬人，他在比賽時出口咬意國後衞基亞連尼的膊頭，令不少星級球迷睇唔過眼！球迷張智霖慨嘆事件難以置信，令他失去睇波意欲：「今年好光怪陸離！我都冇咩興趣追，好多賽果都匪夷所思，不如睇我演唱會算啦！」而女星周秀娜對此表示驚訝，她認為「哨牙蘇」應好好控制自己或向醫生求助：「踢波係用腳唔係用口，如果佢咁有牙力，比賽前可以食吓牛扒同雞髀，唔應該咬人，希望畀佢咬嘅人唔好有陰影，畀着我實嚇親！傷害到人應該要受罰，唔明點解球證唔趕佢出場！」

意大利擁躉李珊珊在微博向愛隊致敬的同時寸爆「哨牙蘇」：「有沒有醫生或高人能解讀一下蘇亞雷斯總愛咬人之行為？……上天保佑，祈求他千萬不要來季加盟我愛的巴塞隆拿！」

陳庭欣罵病態

港姐陳庭欣則懷疑「哨牙蘇」咬人是病態行為：「佢係咪一緊張就咬人？下次不如咬自己啦！咁就唔會畀人罰，電視影到晒，我覺得對意大利唔公平，若然罰佢停賽兩年都幾重！」

而馬德鐘透過經理人回應指理應罰「哨牙蘇」：「無論佢幾好波都好，場內場外都唔應該咬人，罰佢係應該嘅！」至於陳百祥則認為烏拉圭小勝相當合理，並指「哨亞蘇」咬人是個人問題，若他被罰停賽，估計球隊下仗對哥倫比亞或會輸波。雖然受千夫所指，但自認利物浦擁躉的RubberBand成員阿偉力撐「哨牙蘇」：「可能佢太重視場波啦！唔會因為咁唔鍾意佢，我欣賞嘅係佢嘅腳法！」