《吸血新世紀》的劈腿女星姬絲汀史釗活火併貌似黃夏蕙的「臭口名嘴」Joan Rivers！姬絲汀指摘對方的新書唱衰她與導演上床才獲得片約，揚言要告人，但Joan則輕描淡寫回應指，新書講明內容全屬講笑，暗寸姬絲汀傻女才玩認真！

現年81歲的「荷里活黃夏蕙」名嘴Joan Rivers下個月推出的新書《Diary of a Mad Diva》大爆女星醜事，惹來不少是非！書中其中一個章節點名唱衰《吸血新世紀》（Twilight Saga）女星姬絲汀史釗活（Christen Stewart）勾搭導演，內容寫道：「好多大明星只係識做一樣嘢，當然，最出色嗰位係姬絲汀史釗活，佢全靠識得點樣玩弄導演嘅睾丸先至有戲拍！」擺明影射姬絲汀於2011年與人夫導演Rupert Sanders合作《白雪公主之魔幻復仇記》時撻着，背住萬人迷男友羅拔柏迪臣偷食，當時二人被影到有親密行為。雖然後來姬絲汀向羅拔公開道歉，但最終亦不獲原諒分手收場。至於Rupert亦因「感情缺失」而與老婆Liberty Ross離婚。

雙方律師接觸

不過姬絲汀不忿畀人唱，嬲爆派出律師接觸Joan及其工作人員，威脅若Joan不刪改新書內容，便會告上法庭！

但神級阿婆Joan完全冇有怕，雖然承認姬絲汀的律師曾接觸其律師，但寸爆指姬絲汀明顯沒有閱讀清楚其新書，因為序中已寫明內容全屬搞笑，Joan揚言自己縱橫圈中50年有多，見慣風浪，並踩多腳說：「搞笑嘅係姬絲汀就真！我畀佢嘅回答係『你要慶幸自己唔係Kardashian家族，佢哋佔嘅篇幅多你好多！』我喺圈中專開玩笑，你玩認真就傻喇！」

辣着成籮女星

而Joan身邊的消息人士透露，姬絲汀的律師未有再打電話給Joan一方，姬絲汀有機會已讓步，控告亦未必有下文。

《Diary of a Mad Diva》的內容除提及姬絲汀外，Taylor Swift、安妮希芙威（Anna Hathaway）和Miley Cyrus等都有被Joan唱衰。