天后容祖兒本月中在無綫《優秀選》綵排期間，有指被謝安琪（Kay）插隊綵排，英皇感不受尊重拉隊罷玩，無綫為平息「長期戰友」的怒氣，已向兩名節目導演「開刀」祭旗！

有指被插隊的祖兒感到不受尊重。

謝安琪當日是優秀選司儀之一。

近年無綫的音樂節目及頒獎禮，皆獲英皇歌手支持。

洪卓立表示關心祖兒的病況多於其他事件。

無綫與英皇的關係向來Friend底，但近年不斷生變，剛於本月14日舉行的《2014勁歌金曲優秀選第一回》中，激嬲英皇一姐容祖兒，令雙方關係再起暗湧！

有感不被尊重

當晚英皇共得六個獎，包括樂壇天后容祖兒贏得1.5個獎，當日下午所有歌手須入廠綵排，據悉原定與李克勤打頭陣合唱的祖兒唱完後，本應繼續綵排其得獎獨唱歌，但此時另一歌手Kay殺到現場，其助手更向導演要求優先綵排，最終成功打祖兒尖。

有目擊者爆料，被插隊的祖兒感到不被大會尊重，英皇方面覺得被剃眼眉，下令拉隊「散Band」玩無聲抗議，祖兒並以腸胃炎為由臨時甩底頒獎禮。

無綫方面得知搞出大頭佛後已即時耍冧，英皇才留下歌手泳兒及洪卓立撐場，但二人在活動完結前亦閃人。無綫為平息英皇怒氣，決定「開刀」交人以表歉意，請兩位涉事節目導演食「炒魷魚」。

英皇：大家了解晒

對此，英皇行政總裁吳雨在長途電話訪問中暗示確曾發生綵排風波，並說：「過咗去就過咗去，大家了解晒，冇話邊個唔啱，但希望唔好再發生！（嬲？）冇乜嬲唔嬲，總之英皇上下都明白晒。」

至於無綫監製麥鎮東承認兩名導演被炒，並解釋：「我哋人手過盛，呢個係公司決定。（影響與祖兒關係？）有新歌派台都會合作。（驚唔驚佢唔上嚟？）都未有新歌，唔會啩！」而Kay經理人夏森美回應說：「嗰件事唔了解，我哋節目中段先知道祖兒冇演出，但未知原因，亦唔了解TVB嘅安排，我哋綵排都等咗三個鐘。」