世盃女主播屢遇襲

苟芸慧、陳貝兒、鄧佩儀和高鈞賢等正身在巴西拍攝世界盃實況，但當地治安令人擔心，加上睇波的興奮心情令不少球迷熱情如火，身處當地的藝人每次採訪時難免遇上混亂情況。苟姑娘日前於智利對西班牙的球賽當日，在巴西球場做訪問時突然被一名瘋狂智利球迷跑上前嘴對嘴咀了一啖非禮，該名球迷隨即速閃「錫完鬆」！

抱恙照開工

慘被非禮的苟姑娘因事出突然，當場嚇一跳，與工作人員都呆站在原地O晒嘴，加上當時的拍攝隊伍站得較遠，未能立即向苟姑娘施以援手，她憶述當時情況︰「本來導演、導遊、工作人員都喺現場，大家企到較遠影緊，趕唔切幫我。其實好多時都有瘋狂嘅場面，抱起、攬住同錫都好正常，但係咀嘴就接受唔到！我一片空白，個個都呆晒，咀完大家都唔知做得啲乜。」

再次「遇襲」的苟姑娘，驚魂甫定即獲當地巴西女導遊開解，並哭成淚人：「我唔想阻礙拍攝，自己行開咗Cool Down吓。本身諗住忍住唔喊，但件事有侵犯性，跟住個巴西女導遊安慰我，叫我一定要發洩出嚟，我嗰刻真係忍唔住，喊完係舒服啲。」她表示因為工作至上，自己亦不想報警放大事情，經過今次「狼咀」事件，會有心理準備多加注意。另外，苟姑娘生病聲沙仍頂硬上工作，同事都有叫她多休息，節目拍至七月才會返港。

昨日本報記者致電無綫體育組監製李漢源，他坦言有了解當日情況，而工作人員都身形高大，可以保護女藝人：「嗰次咁啱做訪問，過程好快，已經叫佢哋盡量小心啲，酒吧或者複雜地方唔好去。（苟姑娘病咗，畀佢休息？）休息幾日冇所謂，身體健康要緊。」

至於日前因智利球迷硬闖傳媒中心而受傷的陳貝兒，同樣試過被當地球迷錫面，更遭「龍爪手」施以胸襲！但她表示了解球迷的熱情，如非出於惡意都一律當作正常的肢體碰撞：「巴西周圍都係瘋狂球迷，試過畀人咀幾啖，又攬腰，唔係故意抽水。有次同比利時球迷有碰撞，不過以前去開歐洲做採訪，明白有碰撞但冇惡意，有都會叫非禮啦！」有向老公報備的陳貝兒更獲老公搞Gag安慰：「佢話可能外國人未見過咁靚嘅中國人，叫我小心啲。」

張秀文被攬腰

另一位身處巴西直擊賽事的華姐冠軍鄧佩儀，亦坦言有次訪問烏拉圭球迷時，有名球迷貼近自己，欲於鏡頭前錫她的面，可能該球迷只是貪玩搶鏡，知道他們正在拍攝時就停止動作。而前港姐張秀文亦透露歐遊經驗豐富，會孭住大背囊掩護自己，但亦試過失守遭「手多多」的叔叔用手攝入背囊中間攬她的腰。