兩大世界盃熱門隊伍德國及阿根廷昨日凌晨分別作賽，表現卻未如理想，雖然德國僅逼和加納，但港姐陳庭欣、蔡思貝及Celia K.等仍力撐愛隊可首名出線！至於阿根廷苦戰92分鐘才險勝伊朗，Fans陳嘉寶大讚美斯盡顯身價救國！

陳嘉寶大讚美斯腳法勁，在關鍵時刻救番隊波。

雖然陳庭欣為德國僅逼和加納隊而感失望，但她仍為德國打氣。

蔡思貝就算捱眼瞓都睇波撐德國，果然係德國Big Fans！

美斯過關斬將，最終射破網殺敗伊朗。

阿根廷及德國昨日凌晨出戰世界盃分組賽，兩隊均有不少香港球迷，自然引起熱話，但對戰弱隊都未能展現強隊氣勢，阿根廷面對伊朗的嚴密防守陷入苦戰，至92分鐘才由球王美斯破關1：0險勝；而德國一度落後於加納，最終二比二完場。雖然兩強表現失色，但多名圈中球迷仍對愛隊不離不棄！至於被指與美斯猶如餅印的影帝張家輝因昨日趕赴上海而錯過賽事，未能見證「兄弟」入波！

蔡思貝眼瞓都要睇

陳庭欣、蔡思貝、樂瞳、李綺雯及Celia K.（郭穎兒）均熱捧德國，對於愛隊未能贏波難免感到失望，但最興奮的是老將高路斯追平朗拿度在世界盃史上最多入球紀錄（15球），曾在德國讀書的蔡思貝捱眼瞓睇波：「我半夢半醒咁睇，一嘈就扎醒，雖然打和，我都收貨，依家都有四分呀！出線實冇問題，希望高路斯可以再入球破紀錄！」而陳庭欣則表示與父親都是德國擁躉，但對賽果不太滿意：「本身估2比1贏加納，點知最後打和拎得一分，都失望o架！希望下場好啲，首名出線冇問題嘅！」李綺雯則指德國向來有魔咒，次仗未能贏波，今次果然應驗：「中場傳送應該要再做好啲！」Celia K.大讚德國有隊型，進攻全面，深信愛隊下場可贏美國以首名出線。

至於「少女版李若彤」陳嘉寶則力撐阿根廷，雖然只險勝伊朗，但仍深信愛隊會慢慢上力，最終捧盃：「去到92分鐘入波都叫入波！美斯好嘢！關鍵時救番隊波！係贏得好險，但贏就係贏，希望佢哋狀態愈來愈好，自己都估唔到伊朗踢得唔錯，今屆有好多意想不到嘅賽果，好有癮繼續睇！」