今屆巴西世界盃不利名牌球隊，意大利昨日輸波陷入出局危機，亦間接宣判同組的英格蘭「死刑」。圈中頭號「英粉」李克勤直言賽果早已預料，但會繼續「硬撐」愛隊四年後捲土重來，陳百祥 （阿叻）則直指英格蘭根本唔夠班。

圈中「英格蘭躉」克勤戲言趁早着英格蘭波衫捧愛隊，結果英格蘭未能打入16強。

阿叻指英格蘭實力不足，支持是情意結「含淚買上盤」。

黃心穎力撐英西兩國，換來一殼眼淚。

英格蘭於兩場分組賽輸波收場，加上意大利不敵哥斯達黎加，令「英軍」提早宣布出局。「英格蘭躉」李克勤最近出席世界盃活動時曾穿上英格蘭波衫，並笑言要「趁早着」，結果一語成讖！他昨日接受電話訪問難掩失望之情：「都預咗，支持咗咁多年，無論表現係點都會撐落去，希望四年後有新一班人再嚟過啦！」克勤指今屆世界盃有不少令他驚喜的球隊，如哥倫比亞、哥斯達黎加、智利及比利時，但認為最有冠軍相的是德國及阿根廷：「巴西其實踢得唔好，所以唔似冠軍。阿根廷雖然第一場踢得唔好，但係佢哋嘅球員技術係喺巴西之上，冠軍球隊未必一開始就踢得好，德國就整體發揮得好好。」

情意結「含淚買上盤」

至於阿叻認為香港人因「英超」情意結而熱捧英格蘭，可謂是「含淚買上盤」：「鍾意英格蘭係情意結，英超好睇因為係外援，其實佢哋係唔夠班，英格蘭1966年捧盃之後都未好過。」他又解構名牌球隊的死因：「西班牙老化，六年來踢法都冇變過，對手都睇穿晒，出局合理，意大利就青黃不接。」

「英軍」出局，「波妹」黃心穎自言力捧的西班牙與英格蘭雙雙提早「畢業」，令她心碎：「香港人情意結一定支持英格蘭，尋晚仲專登睇意大利，希望意大利幫到英格蘭手，點知兩隊好似夾埋想英格蘭出局咁，意大利啲球員好似唔願跑。不過都接受咗現實，英格蘭踢大賽水準係唔穩定，你睇朗尼Miss咗幾多機會先入到嗰一球。」

意大利以0:1不敵哥斯達黎加，內地女星孟瑤亦在微博留言：「意大利讓我太失望！法國我一直喜歡看好！沒想到他今天給我們那麼大驚喜。」前港姐張名雅明顯對賽果不太感興趣，微博留言只愛看靚仔：「我意思係話美斯球技好勁啫……看波看靚仔是常識吧？」至於身在巴西的陳貝兒在微博大晒於昨日凌晨到海灘參加球迷嘉年華的相片。